„ჩვენ საქართველოს პრეზიდენტთან გვქონდა ძალიან მნიშვნელოვანი შეხვედრა. იცით, რომ ძალიან რთული გამოწვევების წინაშე ვდგავართ. ევროსაბჭოს აქვს ძალიან ცხადი, მტკიცე და ერთიანი პოზიცია. დარწმუნებულები ვართ, ეს მნიშვნელოვანია ჩვენი მეგობრებისთვისაც. ჩვენ ვართ პარტნიორები და თანამშრომლობა გვაკავშირებს ერთმანეთთან“, – განაცხადა დღეს ევროსაბჭოს პრეზიდენტმა, შარლ მიშელმა ბრიუსელში, სალომე ზურაბიშვილთან გამართული სამუშაო შეხვედრის დასასრულს.
სამუშაო შეხვედრაზე მიშელმა ზურაბიშვილი სპეციალურად მიიწვია ბრიუსელში.
მიშელმა ასევე ხაზი გაუსვა იმას, რომ ის ცდილობდა მისი შესაძლებლობების მაქსიმუმი გაეკეთებინა გასულ თვეებში, რათა მხარი დაეჭირა საქართველოში სტაბილურობის, დემოკრატიული და ეკონომიკური რეფორმებისთვის:
„თქვენ იცით ჩემი პირადი დამოკიდებულება საქართველოს მიმართ. ჩვენ, ევროკომისიასა და ევროპარლამენტთან ერთად, ძალიან ჩამოყალიბებული და მკვეთრი პოზიცია გვაქვს – გვსურს ვაჩვენოთ ჩვენი ცხადი მხარდაჭერა, რათა გავაერთიანოთ ძალები და შევქმნათ მტკიცე კავშირები საქართველოსა და ევროკავშირს შორის.
შეხვედრაზე დავსახეთ პრიორიტეტები, რაზეც ერთად უნდა ვიმუშაოთ და რასაც სრულად უნდა მივუძღვნათ თავი, ამ რადიკალურად მძიმე დროში ძალიან მნიშვნელოვანია ერთად ყოფნა. მნიშვნელოვანია გვქონდეს ძალიან ღია და მკაფიო გზავნილები – საერთაშორისო სამართლის, საერთაშორისო უფლებების მხარდასაჭერად, რაც ემსახურება საერთაშორისო წესრიგს, მრავალმხრივ მიდგომას, გაეროს ქარტიისა და მისი მუხლების სრულ პატივისცემას – ესაა მნიშვნელოვანი პრინციპები.
მნიშვნელოვანია პროგრესი, დარწმუნებული უნდა ვიყოთ, რომ კავშირი საქართველოსა და ევროკავშირს შორის არის ძალიან ცხადი და ხელშესახები ქართველი ხალხისთვის“, – აცხადებს ევროსაბჭოს პრეზიდენტი.
„მიმდინარე მოვლენები და ახალი გარემოება ამ ქვეყნის ახალ პერსპექტივას განაპირობებს მომავალში, მაგრამ ამისთვის ჩვენც მზად უნდა ვიყოთ ყველანი” – განაცხადა სალომე ზურაბიშვილმა.
