„უკვე ყველა მიმართულებით არის სამხედრო აგრესია, მე ახლა დონეცკის ოლქში ვარ, ბახმუთში, ეს ბრძოლის ველის უკანა ხაზია,“ – ამბობს სტას კოჟლიუკი, ის უკრაინელი ჟურნალისტია და დღეს დონეცკის ოლქში მუშაობს, როგორც ფრილანსერი. სტასმა „ბათუმელების“ რამდენიმე კითხვაზე მოახერხა პასუხის გაცემა.
„ამ დილის ხუთ საათზე დონეცკში ყველა აფეთქებების ხმამ გამოგვაღვიძა…“ – გვიყვება სტას კოჟლიოუკი, რომლის დაკვირვებითაც ხალხში პანიკა შესამჩნევია. – „ზოგმა ოჯახებთან ერთად არჩია წასვლა, ბენზინგასამართ სადგურებზე რიგები იყო. ჩვენც საათობით ვიდექით რიგში. მე ვესაუბრე ძალიან ბევრ ადამიანს. უმრავლესობა ამბობს, რომ არსად წასვლას არ აპირებს.
დაიხურა რამდენიმე საზოგადოებრივი ობიექტი, სასტუმრო…“
ჟურნალისტი აღნიშნავს, რომ უკვე დღეს, დილიდან, ჟურნალისტების ნაწილმაც დატოვა რეგიონი, მაგრამ „ახლა უკვე ყველგან ერთი და იგივე სიტუაციაა,“ – დასძენს სტასი.
სტას კოჟლიუკი
„თავდაპირველად ეს სამხედრო აგრესია მახსენებდა ყირიმს, მაგრამ ახლა იგივე სიტუაციაა ხარკოვთანაც, იქაც ცდილობენ გადმოკვეთონ ხარკოვის ოლქის საზღვრები, იერიშია ჩრდილოეთ უკრაინაში და სხვა მიმართულებითაც, ბელარუსიის საზღვართან.
ჟურნალისტებისთვის მუშაობა ახლა განსაკუთრებით რთულია და საფრთხილო, ხშირად წყდება სიგნალი, გვიწევს უსაფრთხოების წესების მკაცრი დაცვა,“ – გვითხრა სტას კოჟლიუკმა.
————
დღეს, 24 თებერვალს, დილით, რუსეთი უკრაინას თავს დაესხა. დაიბომბა რამდენიმე ქალაქი. ქვეყნის მასშტაბით სხვადასხვა რეგიონში სამხედრო დაპირისპირება მიმდინარეობს. არის მსხვერპლიც.
ამ თემაზე:
