უკრაინის შინაგან საქმეთა სამინისტროს ინფორმაციით, ქალაქ ჩუგუევში კორპუსის დაბომბვის შედეგად 15 წლის ბიჭი დაიღუპა. არიან დაჭრილები.
დღეს, 24 თებერვალს, უკრაინის დროით 08:23 საათზე, უკრაინის სახანძრო სამსახურში შევიდა შეტყობინება, რომ ქალაქ ჩუგუევში ხუთსართულიან საცხოვრებელ კორპუსში ხანძარია. სამინისტროს ცნობით, კორპუსში ცეცხლი დაბომბვის შედეგად გაჩნდა.
შემთხვევის ადგილზე სამაშველო სამსახურის 3 ოპერატიული ჯგუფი და 1 სასწრაფო დახმარების მანქანა გაემგზავრა. მაშველების მისვლის მომენტისთვის კორპუსში იწვოდა ბინების აივნები მეორე და მესამე სართულებზე, ასევე, ბინა მეოთხე სართულზე. ხანძრის საერთო ფართობი დაახლოებით 100 კვ.მ იყო.
აფეთქების შედეგად დაიღუპა არასრულწლოვანი, არიან დაჭრილები. სახლიდან მაშველებმა 15 მცხოვრებლის ევაკუაცია მოახდინეს.
ხანძარი ლოკალიზებულია, უკრაინის დროით 11:41 საათის მონაცემებით, მიმდინარეობს ხანძრის ლიკვიდაცია.
