საქართველოში მოქმედ სხვადასხვა რელიგიურ ორგანიზაციებში სასულიერო პირების დაახლოებით 75-80 პროცენტი ვაქცინირებულია. ამის შესახებ ინფორმაციას საზოგადოებრივი ორგანიზაცია „სოლიდარობის თემი“ ავრცელებს.
ქართული მუსლიმური თემის სასულიერო პირების დაახლოებით 60 პროცენტია ამ დროისთვის კორონავირუსის საწინააღმდეგო ვაქცინით აცრილი. ამ დროისთვის ვაქცინირებულია ასევე ქართველი კათოლიკე სასულიერო პირების 83 და ევანგელისტურ-ბაპტისტური ეკლესიის სასულიერო პირების 75 პროცენტი.
აღნიშნული ინფორმაცია „ბათუმელებთანაც“ დაადასტურეს აღნიშნული რელიგიური ორგანიზაციების წარმომადგენლებმა.
კორონავირუსის საწინააღმდეგო ვაქცინით იცრება მართლმადიდებელი სასულიერო პირების ნაწილიც, ნაწილი კი ანტივაქსერული განწყობებით გამოირჩევა.
„ბათუმელებმა“ საქართველოს საპატრიარქოს პრესსამსახურს ჰკითხა, რამდენი მართლმადიდებელი სასულიერო პირია აცრილი, თუმცა საპატრიარქოდან კითხვაზე პასუხი ამ დრომდე არ მიგვიღია.
23 აგვისტოს მონაცემებით, საქართველოში ბოლო 24 საათში კორონავირუსით ინფიცირების 2 354 ახალი შემთხვევა გამოვლინდა, გარდაიცვალა 60 ადამიანი.
დღიურად ჩატარებული აცრების რაოდენობამ კვირას 17 670 შეადგინა, თუმცა სამედიცინო სფეროს ცალკეული წარმომადგენლები აქტიურად მოუწოდებენ მოსახლეობას, რომ აიცრან და დაიცვან საკუთარი სიცოცხლე.
_________________________________
მთავარი ფოტო: კათოლიკე სასულიერო პირები კორონავირუსის საწინააღმდეგო ვაქცინით აიცრნენ
