პარტია „საქართველოსთვის“ აჭარის ორგანიზაციის თავმჯდომარის განცხადებით, ხელისუფლება მათ კანდიდატებს აშანტაჟებს ან ცდილობს მოისყიდოს. ირაკლი მიქელაძემ ამის შესახებ დღეს ბრიფინგზე ისაუბრა.
„ხელისუფლების წარმომადგენლები ახორციელებენ ზეწოლას ჩვენს კანდიდატებზე და რიგ შემთხვევაში ხდება სოლიდური თანხის შეთავაზებაც კი იმისთვის, რომ წარდგინების შემდგომ მათ გააკეთონ განცხადება ჩვენი გუნდის დატოვების შესახებ.
მინდა მივმართო ხელისუფლებას, რა ტიპის ძალადობაც არ უნდა განხორციელდეს, რა ტიპის მოსყიდვა და შანტაჟიც არ უნდა განხორციელდეს, ჩვენ თქვენ ნამდვილად ვერ შეგვაშინებთ და აუცილებად ქართველი ხალხი გიპასუხებთ არჩევნებზე და ეს პასუხი იქნება თქვენი ხელისუფლების ცვლილება“.
ირაკლი მიქელაძეს არ დაუსახელებია კონკრეტული პირები, ვისაც ხელისუფლება აშანტაჟებს ან სოლიდურ თანხას სთავაზობს. მან თქვა, რომ „მიუხედავად მათი დაშინებისა“ ამის შესახებ ინფორმაციას მაინც აწვდიან ადამიანები პარტიას.
ექსპრემიერ გიორგი გახარიას პარტია „საქართველოსთვის“ აჭარაში თვითმმართველობის არჩევნებისთვის კანდიდატებს 25 აგვისტოს დაასახელებს.
თვითმმართველობის არჩევნები 2 ოქტომბერს გაიმართება.
