კოვიდგადატანილი პირები, ვაქცინის ერთი დოზის გაკეთების შემთხვევაში ვაქცინირებულად ჩაითვლებიან.
„მსოფლიო პრაქტიკის გათვალისწინებით საბჭომ განიხილა და მიიღო გადაწყვეტილება, რომ კოვიდგადატანილი პირები, ვისაც ვაქცინა ერთხელ აქვთ გაკეთებული, გათანაბრდებიან 2-დოზით ვაქცინერებულებთან“, – ეს განცხადება მთავრობის დღევანდელი სხდომის შემდეგ უწყებათაშორის საკოორდინაციო საბჭოსთან არსებული ოპერაციული შტაბის უფროსმა, გიორგი ღიბრაძემ გააკეთა.
მისი თქმით, მათზეც გავრცელდება ის რეგულაცია, რაც გათვალისწინებულია სრულად ვაქცინირებულებისთვის.
ჯერჯერობით 2 დოზით აცრილებისთვის საქართველოში რაიმე ტიპის შეღავათი არ მოქმედებს. ღიბრაძემ დააკონკრეტა, რომ ამჟამად ამ შეღავათით საზღვრის კვეთისას სარგებლობენ.
ჯანდაცვის მინისტრის მოადგილემ თამარ გაბუნიამ მოგვიანებით განმარტა, რომ ზოგიერთი ქვეყანა ერთხელ აცრილსა და კოვიდგადატანილ პირს სრულად ვაქცინირებულად აღიარებს. მისი თქმით, აქ საუბარია იმაზე, რომ თუ პირმა თავის ქვეყანაში მიიღო სრულად ვაქცინირებულის სტატუსი, ეს საქართველომაც აღიაროს. მისივე თქმით, საქართველოში ასეთი პროტოკოლი არ მოქმედებს საქართველოს მოქალაქეებისთვის და აუცილებელია ორჯერადი ვაქცინაცია სრულად ვაქცინირებულის სტატუსის მისაღებად.
