ფინანსთა სამინისტროს შემოსავლების სამსახურის ინფორმაციით, 2021 წლის 12 მაისის ჩათვლით, არ იმუშავებს მოქალაქეთა მომსახურების სერვისცენტრები.
„გთხოვთ, აღნიშნული ინფორმაცია გაითვალისწინოთ სერვისებით [მ.შ. ელექტრონული] სარგებლობისას,“ – აცხადებს შემოსავლების სამსახური.
„აქვე გაცნობებთ, რომ საბაჟო გამშვები პუნქტები მუშაობენ კალენდარული კვირის ყოველ დღეს [საქართველოს კანონმდებლობით დადგენილი უქმე დღეების ჩათვლით], კორონავირუსის გავრცელების პრევენციის მიზნით, გამოცხადებულ უქმე დღეებში, 2021 წლის 4, 5, 6, 7, 8, 10, 11 მაისს საბაჟო დეპარტამენტის გაფორმების ეკონომიკური ზონები, ასევე, გაფორმების განყოფილებები და საბაჟო ღირებულებისა და საქონლის კლასიფიკაციის სამმართველო საქმიანობას ჩვეულ რეჟიმში გააგრძელებენ. ამასთან, სამუშაო დროს გაწეული მომსახურებისთვის, საქართველოს მთავრობის N96-ე დადგენილებით განსაზღვრული ტარიფების გაორმაგება არ მოხდება,“ – აღნიშნულია შემოსავლების სამსახურის მიერ გავრცელებულ განცხადებაში.
ამასთან, 2021 წლის, 4, 5, 6, 7, 10, 11 მაისს, შემოსავლების სამსახურთან კომუნიკაციის მიზნით, დამატებითი ინფორმაციის მისაღებად, შეგიძლიათ დაუკავშირდეთ საინფორმაციო სატელეფონო ცენტრს – 2 299 299 [09:00 საათიდან -18:00 საათამდე], ასევე ისარგებლოთ – RS ჩათის მეშვეობით ან ელექტრონული ფოსტით: info@rs.ge
საქართველოს მთავრობის დადგენილებით 2021 წლის 4 მაისიდან 8 მაისის ჩათვლით დღეები და 10-11 მაისი უქმე დღეებადაა გამოცხადებული. უქმე დღეა 12 მაისიც.
