საკონსტიტუციო სასამართლოს მოსამართლეები დღეს 17 დეკემბერს, კამპანია “ეს შენ გეხებას” ფარგლებში მომზადებულ სარჩელს განიხილავენ.
მოსარჩელეები კანონის იმ ნორმებს ასაჩივრებენ, რის საფუძველზეც სამართალდამცავ ორგანოებს კომუნიკაციებთან წვდომის შესაძლებლობა აქვთ, რაც საიას იურისტის გიორგი გოცირიძის განმარტებით ადამიანის თვალთვალისა და მოსმენების უფლებას სასამართლო ნებართვის გარეშე იძლევა:
„მიგვაჩნია, რომ სამართალდამცავი ორგანოების ამგვარი შესაძლებლობა კონსტუტიციის მე-16 და მე-20 მუხლებს ეწინააღმდეგება, რაც პირად ცხოვრებაში უსაფუძვლოდ ჩარევას ნიშნავს“- განმარტა „ნეტგაზეთთან“ გიორგი გოცირიძემ.
გიორგი გოცირიძის შეფასებით, მოსმენების გასაღები უნდა ჰქონდეს ნეიტრალურ მხარეს ან მობილურ ოპერატორებს, როგორც ეს ევროპის ქვეყნების უმრავლესობაშია.
მოპასუხე მხარე საქართველოს პარლამენტის წარმომადგენელია.
სასამართლო დღეს პროკურატურის წარმომადგენელს და პერსონალურ მონაცემთა დაცვის ინსპექტორს თამარ ქალდანს დაკითხავს. სასამართლო პროცესი 10 საათზე უნდა დაწყებულიყო და ჯერაც არ დაწყებულა.
