საქართველოში ყველაზე მაღალი საშუალო თვიური ხელფასი თბილისსა და აჭარაში აქვთ დასაქმებულებს, ყველაზე დაბალი კი – გურიასა და რაჭა-ლეჩხუმში.
ინფორმაცია ამის შესახებ საქართველოს სტატისტიკის ეროვნულმა სამსახურმა გამოაქვეყნა 2019 წლის მონაცემებზე დაყრდნობით.
საქსტატის ცნობით, 2019 წელს საქართველოში დაქირავებით დასაქმებულთა საშუალო თვიური ნომინალური ხელფასი გასულ წელთან შედარებით 5.7 პროცენტით (61.2 ლარით) გაიზარდა და 1 129.5 ლარი შეადგინა.
წყარო: საქსტატი
ასევე საქსტატის ცნობით, 2019 წელს, წინა წელთან შედარებით, ხელფასების ზრდა თითქმის ყველა სექტორში შეინიშნებოდა და საქმიანობების სახეების მიხედვით შედარებით მაღალი ხელფასი დაფიქსირდა შემდეგ დარგებში:
- საფინანსო და სადაზღვევო საქმიანობა – 2 030.2 ლარი (წინა წელთან შედარებით შემცირდა 9.2 პროცენტით);
- პროფესიული, სამეცნიერო და ტექნიკური საქმიანობები – 1 896.0 ლარი (წინა წელთან შედარებით გაიზარდა 10.7 პროცენტით);
- მშენებლობა – 1 631.1 ლარი (წინა წელთან შედარებით გაიზარდა 5.1 პროცენტით)
2019 წელს სახელმწიფო სექტორში დაქირავებით დასაქმებულთა საშუალო თვიური ხელფასი 237.4 ლარით ნაკლები იყო არასახელმწიფო სექტორში დაქირავებულებთან შედარებით. ამასთან, 2018 წელთან შედარებით სახელმწიფო სექტორში ხელფასი 9.1 პროცენტით, ხოლო არასახელმწიფო სექტორში 4.1 პროცენტით გაიზარდა და შესაბამისად 973.7 და 1 211.1 ლარი შეადგინა.
