რუსი მილიარდერი, 52 წლის დიმიტრი ბოსოვი, საკუთარ სახლში გარდაცვლილი იპოვეს. ოფიციალური ინფორმაციით მან სიცოცხლე მოსკოვში, საკუთარ სახლში თვითმკვლელობით დაასრულა. ბოსოვი ფორბსის მილიარდერთა სიაში იყო და ფლობდა კომპანიებს “Сибантрацит” და “Востокуголь”.
სააგენტო ინტერფაქსი საკუთარ წყაროებზე დაყრდნობით იტყობინება, რომ მაისის დღესასწაულების პერიოდში ბოსოვი საკუთარ სახლში, ოდინცოვსკის რაიონში, უსოვოს დასახლებაში იყო. ინტერფაქსის წყარო ჰყვება, რომ 5 მაისის საღამოს ბოსოვი ზარებსა და შეტყობინებებს მესინჯერში აღარ პასუხობდა, რის შემდეგაც მას ცოლმა მიაკითხა სახლში და მეუღლე გარდაცვლილი იპოვა.
პირველი დიდი კაპიტალი, BBC-ის ინფორმაციით, რუსმა მილიარდერმა 1990 წელს დააგროვა ალუმინის ვაჭრობით. ის ამ დროისთვის კრანსნოიარსკის ალუმინის ქარხნის აქციონერი და კომპანია Trans World Commodities-ს რუსეთის წარმომადგენლობის დირექტორი იყო.
ბოსოვი ალუმინის ბიზნესს ჩამოშორდა და 2000-იანი წლებიდან რუსეთსა და საზღვარგარეთ სამრეწველო აქტივების ინვესტიციებით იყო დაკავებული. ამ დროისთვის ის ფლობდა კომპანიას ,,Аллтек”-ს.
ქვანახშირის მომპოვებელი კომპანიების “Сибантрацит” და “Востокуголь” საკონტროლო პაკეტები მილიარდერ ბოსოვის ყველაზე მსხვილი აქტივებია.
აღსანიშნავია, რომ კომპანია “Сибантрацит”-ი გენერალური სპონსორია რუსეთში ,,ღამის ჰოკეის ლიგის”, რომელიც პუტინის ინიციატივით შეიქმნა მოყვარული ჰოკეისტებისთვის.
ბოსოვს ეკუთვნის ასევე მოსკოვში ცენტრი “Артплей”, ასახელებდნენ გაზეთ”Ведомости”-ის ინვესტორადაც.
2020 წელს ბოსოვი ფორბსის ყველაზე მდიდარი რუსი ბიზნესმენების სიაში 86-ე ადგილზე მოხვდა, მისი ქონება $1,1 მილიარდია.
