“მოგმართავთ თხოვნით, უფრო მაღალი პასუხისმგებლობითა და გაგებით მოეკიდოთ ბულვარში არსებულ შეზღუდვებს და თავი შეიკავოთ სეირნობისაგან, ქვეყანაში COVID-19 ვირუსის მიზეზით გამოცხადებული საგანგებო მდგომარეობის პერიოდში. გთხოვთ, ამასთანავე დაემორჩილოთ ხმოვანი გაფრთხილების მითითებებს, რითიც საკუთარ ჯანმრთელობასთან ერთად დაიცავთ თქვენი თუ ირგვლივ მყოფი ადამიანების ჯანმრთელობას,” -ეს განცხადება ბათუმის ბულვარის ადმინისტრაციამ დღეს, 20 აპრილს გაავრცელა.
ქვეყნის მასშტაბით გამოცხადებული კარანტინის მიუხედავად ბათუმის ბულვარი, ბათუმის პორტი და იახტკლუბის მიმდებარე ტერიტორია მასობრივი თავშეყრის ადგილადაა ქცეული. მიუხედავად იმისა, რომ ბულვარის ადმინისტრაციამ ყველა გასართობი ატრაქცია წითელი ლენტით შემოსაზღვრა, მოქალაქეები აკრძალვებს არ ემორჩილებიან.
ბათუმის ბულვარის ადმინისტრაცია თავის განცხადებაში კიდევ ერთხელ აფრთხილებს მოქალაქეებს და სთხოვს, რომ თავი შეიკავონ და მაქსიმალურად შეზღუდონ გადაადგილება ბულვარის ტერიტორიაზე.
“შექმნილ ვითარებაში თითოეული თქვენგანის მზაობა და მხარდაჭერა სასიცოცხლოდ მნიშვნელოვანია. გვჯერა, რომ ერთიანი ძალისხმევითა და თანადგომით მალე დავამარცხებთ ვირუსს,” – ნათქვამია ბულვარის ადმინისტრაციის განცხადებაში.
მთავარი ფოტო: მეათე ნავმისადგომის მიმდებარე ტერიტორია დღეს, 20 აპრილს.
