ბელორუსი მწერალი სვეტლანა ალექსიევიჩი გამომცემლობას ხსნის, სადაც მხოლოდ ქალი ავტორების ტექსტებს დაბეჭდავენ.
„კაცები ყველგან არიან, ქალების ტექსტები იშვიათად იბეჭდება“ – ამბობს ნობელის პრემიის ლაურეატი ბოლორუსულ გამოცემა Nasha Niva-სთან. მისივე თქმით, გამომცემლობა ქალებისა და კაცების ტექსტების თანაბარ პირობებში მოქცევას შეუწყობს ხელს.
გამომცემლობის იდეა ალექსიევიჩს რამდენიმე თვის წინ გაუჩნდა და მწერლის თქმით ის გავლენას მოახდენს ქალი ავტორების თავდაჯერებასა და სურვილზე – წერონ.
2019 წლის ოქტომბერში სვეტლანა ალექსიევიჩმა ესპანურ გამოცემა „ელ-მუნდოსთან“ თქვა, რომ თანამედროვე სამყაროში ერთ-ერთი მთავარი გამოწვევა ადამიანებს შორის ურთიერთპატივისცემა და ერთმანეთის მიმართ რაციონალური დამოკიდებულებაა, რაშიც დიდ როლს თამაშობს ფემინისტური შეხედულებები.
ნობელის პრემიის ლაურეატის ტექსტები 52 ენაზეა თარგმნილი და გამოცემულია 55 ქვეყანაში.
გამომცემლობა რამდენიმე თვეში ამოქმედდება და პირველად ბელორუსი ავტორების, ევა ვეზნავეცისა და ტატიანა სკორკინას ტექსტებს გამოსცემს.
