შპს „ბათუმი ცენტრალი“ ბათუმში, ზღვის სანაპირო ზოლში, მრავალფუნქციური კომპლექსის მშენებლობას გეგმავს. კომპანიამ ნებართვის მოსაპოვებლად დადგენილი პროცედურების გავლის მიზნით მერიას მიმართა.
ტერიტორია, სადაც კომპანია კომპლექსის მშენებლობას გეგმავს, 8526 კვადრატული მეტრია და „ბათუმი ცენტრალის“ გვერდით მდებარეობს. 5000 კვადრატულ მეტრზე დაგეგმილი მშენებლობის შემთხვევაში, კანონმდებლობა სამშენებლოდ გამიზნული მიწის ნაკვეთის განაშენიანების რეგულირების გეგმის [გრგ] მომზადებას ითვალისწინებს.
გრგ-ს მომზადებაზე კომპანიას დავალება მერიამ საკრებულოს თანხმობით უნდა მისცეს. მანამდე კი მერია, ასევე, საკრებულოს თანხმობით იწყებს ადმინისტრაციულ წარმოებას დავალების პირობების განსაზღვრის მიზნით. წარმოების დასაწყებად საკრებულოს თანხმობა მერიამ საკრებულოსგან დღეს, 30 ოქტომბერს მიიღო.
„ბათუმი ცენტრალის“ 45 პროცენტს ბიზნესმენი გიორგი ჭყონია, 55 პროცენტს კი შპს „გზა“ ფლობს, რომლის ასივე პროცენტის მფლობელიც ასევე გიორგი ჭყონიაა.
გიორგი ჭყონია „ქართული ოცნების“ აქტიური შემწირველია, 2016-2017 წლებში მან „ქართულ ოცნებას“ 120 000 ლარი შესწირა, სალომე ზურაბიშვილს კი, როგორც „ოცნების“ მხარდაჭერილ დამოუკიდებელ კანდიდატს საპრეზიდენტო არჩევნებზე 60 000 ლარი შესწირა.
შპს „გზა“ უკვე წლებია იღებს სახელმწიფო სტრუქტურებისგან მაღალბიუჯეტიან დაკვეთებს ელექტრონული შესყიდვების გზით.
