დღეს, 25 სექტემბერს, ქობულეთის სანაპირო ზოლში აღსრულების ბიურომ იმ ხუთი კაფეს დემონტაჟი დაიწყო, რომელთა მეპატრონეებსაც მერიასთან გაფორმებული საიჯარო ხელშეკრულებების ვადა გაუვიდათ, ვადის გაგრძელებაზე კი, მერიამ მათ უარი უთხრა.
ერთ-ერთ კაფესთან, „მონოპოლთან“ კი, მცირე დაპირისპირებასაც ჰქონდა ადგილი – აჭარის ტელევიზიამ გაავრცელა ინფორმაცია იმის შესახებ, რომ ერთ-ერთი მესაკუთრე დემონტაჟის დაწყების შემთხვევაში თვითდაზიანებების მიყენებით იმუქრებოდა. ამ ფაქტზე შეტყობინება შსს-ში არ შესულა.
ქობულეთის მერი, მირიან ქათამაძე, გადაწყვეტილებას შეთანხმების ვადის გასვლის გარდა, ქობულეთის ბულვარის სარეაბილიტაციო სამუშაოებითაც ხნის და განმარტავს, რომ პროექტი ზემოთ აღნიშნულ ობიექტებს არ ითვალისწინებს. ის მედიაში გავრცელებულ ინფორმაციას, ერთ-ერთი მეპატრონის მიერ პროტესტის ნიშნად თვითდაზიანებების მიყენების მცდელობის შესახებ, სოციალურ ქსელში გამოეხმაურა.
„… მშენებლობის შესახებ [გულისხმობს ბულვარის სარეაბილიტაციო სამუშაოებს] დიდი ხნით ადრე იყო ინფორმირებული აღნიშნული კვების ობიექტი „მონოპოლი“ და არამარტო ეს ობიექტი. ტურისტული სეზონის დაწყებამდე ჩვენ თითოეულ მათგანთან გვქონდა არაერთი შეხვედრა, სადაც ჩვენ მიერ შეთავაზებული იქნა ობიექტის ნებით დემონტაჟის პირობებში, სხვა, ალტერნატიული ფართობის გამოყოფაზე წარმოედგინათ წინადადებები განსახილველად, რაზეც მეპატრონეებმა სასტიკი უარი განაცხადეს და აღნიშნეს, რომ მიმდინარე წელს ტურისტულ სეზონთან დაკავშირებით იმუშავებდნენ და მიმდინარე წლის 15 სექტემბრამდე საკუთარი ნებით და საშუალებებით განახორციელებდნენ დემონტაჟს. თუმცა შეთანხმება არ შეასრულეს, შესაბამისად, მერიამ გამოიყენა იძულებითი აღსრულების საშუალება“, – წერს ქობულეთის მერი.
კაფეების მეპატრონეები კი მერიის მხრიდან შერჩევით მიდგომაზე საუბრობენ და ამბობენ, რომ ზოგიერთ კაფეს მერიამ გვერდი აუარა და მათ მეპატრონეებს მუშაობის გასაგრძელებლად ხელშეკრულებების ვადაც გაუგრძელა, სხვებს კი ვადა არ გაუგრძელეს, ჯერ გააფრთხილეს, შემდეგ – დააჯარიმეს და საქმე აღსრულების ბიუროს გადასცეს.
მერიის პრესსამსახურის ინფორმაციით, იმ კაფეების მეპატრონეებს, რომლებზედაც დაჯარიმებულები საუბრობენ, ჯერჯერობით მოქმედი ხელშეკრულებები აქვთ, თუმცა მათი ვადებიც იწურება და ისინიც გააფრთხილეს, ხოლო ერთ-ერთ კაფესთან გაფორმებული ხელშეკრულება 2020 წლის ბოლომდე გრძელდება.
კაფე „მონოპოლის“ მეპატრონის, სულხან დიასამიძის ინფორმაციით, ქობულეთის მერიას მოლაპარაკების მიზნით რამდენჯერმე მიმართეს, თუმცა მერიამ მათი თხოვნა არ გაითვალისწინა. ხუთი კაფეს მეპატრონე წერილობით გააფრთხილეს და კონკრეტული ვადა მისცეს დემონტაჟისთვის, შემდეგ კი ჯერ 3000, შემდეგ 6000 ლარით დააჯარიმეს. დღეს, 15 სექტემბერს, აღსრულების ბიურომ დემონტაჟის სამუშაოები დაიწყო.
მერიის გადაწყვეტილებას უარყოფითად აფასებს ქობულეთის საკრებულოს ოპოზიციაც. საკრებულოს წევრი „ნაციონალური მოძრაობიდან“ ბონდო თედორაძე მიიჩნევს, რომ არასწორია შეთავაზება „თქვენ თვითონ მოძებნეთ ფართობები და ჩვენ გაგიფორმებთ ხელშეკრულებებს“. გამომდინარე იქედან, რომ მსგავსი ხელშეკრულებების ვადების გაგრძელების მაგალითები არსებობს, ამ პირებსაც ჰქონდათ განცდა, რომ მიაღწევდნენ მოლაპარაკებას, ამიტომაც ჩადეს ინვესტიცია და განავითარეს ობიექტები.“
