ბათუმის პირველ, მე-2 და მე-6 საჯარო სკოლებში იტალიური ენის შესწავლა დაიწყო. იტალიურს შეისწავლიან ასევე ქობულეთის პირველ და მე-6 საჯარო სკოლებშიც. საგანი არჩევითი იქნება და სწავლება მეხუთე და მეათე კლასებიდან დაიწყება.
როგორც აჭარის განათლების სამინისტროში „ბათუმელებს“ უთხრეს, საჯარო სკოლებში იტალიური ენის შესწავლა განათლების სამინისტროსა და საქართველოში იტალიის საელჩოს თანამშრომლობით გადაწყდა.
სამინისტროს ინფორმაციით, ამ პროექტის კორდინატორია ქართულ-იტალიური საგანმანათლებლო არასამთავრობო ორგანიზაცია „მინერვა“, რომელმაც ეროვნული სასწავლო გეგმის მიხედვით შეადგინა იტალიურის, როგორც მეორე უცხო ენის სწავლების პროგრამა და სტანდარტი.
სკოლებს სახელმძღვანელოებით იტალიის საგარეო საქმეთა სამინისტრო უზრუნველყოფს. „მან ასევე გამოყო დამატებითი თანხები მასწავლებლების სახელფასო ფონდისთვის. ასევე, გაფორმდა თანამშრომლობის მემორანდუმი მასწავლებელთა პროფესიული განვითარების ეროვნულ ცენტრსა და ქართულ-იტალიურ „მინერვას“ შორის, რომლის მიზანია განათლების სისტემაში იტალიური ენისა და კულტურის დანერგვის ხელშეწყობა.
მხარეები უზრუნველყოფენ იტალიური ენის მასწავლებლების პროფესიულ გადამზადებას და კვალიფიკაციის ამაღლებას“, – აცხადებენ აჭარის განათლების სამინისტროში.
სამინისტროს ინფორმაციით, ორგანიზაციამ ასევე აიღო ვალდებულება, ყოველწლიურად შეარჩიოს იტალიურენოვანი მოხალისე მასწავლებლები „ასწავლე და ისწავლე საქართველოსთან ერთად“ პროგრამის ფარგლებში, რაც ითვალისწინებს სასწავლო რესურსების მოძიებაში დახმარებას.
„სწავლება დაფუძნებული იქნება როგორც პირისპირ, ასევე, ონლაინსწავლებაზე. პარტნიორი მხარეების ხელშეწყობით დაგეგმილია გაცვლითი კულტურული პროგრამები იტალიურ და ქართულ სკოლებს შორის“, – გვითხრეს სამინისტროში.
წელს, ახალი სასწავლო წლიდან იტალიური ენა თბილისის 20 სკოლაშიც შეისწავლება. აქედან 13 საჯარო, 7 კი კერძო სკოლაა.
