აჭარის ჯანდაცვის სამინისტროს ინფორმაციით, დღეს ბათუმში გარდაიცვალა 6 წლის ბიჭი, რომლის მშობლებიც გუშინ ქობულეთის შემოვლით გზაზე ავტოავარიის შედეგად დაიღუპნენ. ბავშვი იმავე ავტომანქანაში იმყოფებოდა, რომელშიც მისი მშობლები. ავარიის შემდეგ ბავშვი ბათუმის დედათა და ბავშვთა ჯანმრთელობის ცენტრში ჰყავდათ გადაყვანილი.
დაღუპული ცოლ-ქმრის კიდევ ერთი შვილი – 5 წლის ბავშვი, რომელიც ასევე ავარიაში მოყვა, თბილისში, იაშვილის კლინიკაშია გადაყვანილი.
ავარია ქობულეთში, რა დროსაც ორი ტურისტი, ცოლ-ქმარი დაიღუპა, გუშინ, 13 ივლისს მოხდა ქობულეთის შემოვლით გზაზე. შსს-ს ინფორმაციით, ავარიის დროს ერთმანეთს სამი მინივენი შეეჯახა.
აჭარის ჯანდაცვის სამინისტროს ინფორმაციით, ქობულეთის შემოვლით გზაზე მომხდარი ავარიის შედეგად ჯამში 13 ადამიანი დაშავდა, ორი მათგანი, მძღოლები, საქართველოს მოქალაქეები არიან, დანარჩენები კი – უცხო ქვეყნის მოქალაქეები, პოლონელი და არაბი ტურისტები.
