ტურიზმი, მასთან დაკავშირებული პრობლემები და გამოწვევებია ტურიზმის ფესტივალ „ტურისტერის“ მთავარი თემა. დარგის სპეციალისტები და დაინტერესებული პირები საქართველოში ტურიზმთან დაკავშირებულ საკითხებს განიხილავენ ბათუმში, კლუბ „გეითში“, სადაც ფესტივალი მიმდინარეობს.
ფესტივალი „ტურისტერი“ ბათუმში დღეს, 31 მარტს გაიხსნა. ფესტივალი „ტურიზმის ინსტიტუტისა“ და მარკეტინგული კომპანია „შინდის“ ერთობლივი პროექტია.
ფესტივალის პირველი ნაწილი ფორუმს დაეთმო, სადაც დარგის სპეციალისტებმა ტურიზმის პოლიტიკა განიხილეს.
პანელური განხილვების დაწყებამდე ტურიზმის სამართლის ექსპერტმა ირინე ურუშაძემ მოკლედ ჩამოთვალა ის პრობლემები, რომლებსაც ფორუმი შეეხო:
„დარგის მართვის ორგანო განსაზღვრულია, თუმცა არ იკვეთება რომელი ორგანო ასრულებს ამ ფუნქციებს სრულად. გარდა ამისა, სერტიფიცირებისა და ლიცენზირების საკითხი კანონმდებლობაში მოცემულია, თუმცა რეალურად პრაქტიკაში არც ტურისტული ობიექტების სერტიფიცირება ხდება, არც შესაბამისობის სერტიფიკატის გაცემა და არც ლიცენზირებას ექვემდებარება გარკვეული ტურისტული ობიექტები. კურორტების რეგულირებას რაც შეეხება, აქაც მნიშვნელოვანი გამოწვევები გვაქვს, გვაქვს კურორტების ჩამონათვალი, რაც არ განახლებულა დიდი ხანია.
ხარისხის რეგულირება არის მეორე მიმართულება, რომელიც უმნიშვნელოვანესია დარგისათვის. ბათუმში, აჭარაში, ძალიან კარგად გვესმის რას ნიშნავს ეს, უსაფრთხოებაზე როდესაც ვსაუბრობთ. სამწუხაროდ არაერთი მოვლენა მოხდა, რომელმაც დაგვანახა ამის მწვავე საჭიროება. დღევანდელი კანონმდებლობა საქართველოში ითვალისწინებს მხოლოდ პროდუქტის ხარისხის რეგულირებას და სერვისი, როგორც ასეთი, რეგულირებული არ არის, მხოლოდ სამოქალაქო კოდექსის ზოგადი ნორმები არეგულირებს ამ მიმართულებას, თუმცა არის რიგი კანონმდებლობა, რომელიც იგივე უსაფრთხოებაზე საუბრობს, ესაა სახანძრო უსაფრთხოება თუ სურსათის უვნებლობა და საბედნიეროდ ეს კანონმდებლობა უკვე სავალდებულო გახდა დარგის წარმომადგენლებისათვის.
რაც შეეხება საგადასახადო რეგულაციებს, სპეციალური გადასახადი, მოსაკრებელი ტურიზმის მიმართულებით არ გვაქვს, თუმცა არის არაერთი საგადასახადო შეღავათი, რომელიც ახალისებს ტურიზმს. არის საშეღავათო პირობებიც ტურისტული ზონებისათვის, თუმცა რამდენად მუშაობს ეს რეგულირება, ცალკე კვლევის საგანია ალბათ“ – განაცხადა ირინე ურუშაძემ.
მან ასევე ისაუბრა სტატისტიკის წარმოების მნიშვნელობაზე, რაც იძლევა საშუალებას, განისაზღვროს დარგის საჭიროებები. მისივე თქმით, ამ მიმართულებითაც არსებობს ხარვეზები.
ფესტივალ „ტურისტერზე“ ამჟამად კულინარიული პაუზაა, სადაც ლაზური და აჭარის მთის სამზარეულოა წარმოდგენილი. ფესტივალის შემადგენელი ნაწილია ასევე სტარტაპების გამოფენა, სადაც ფესტივალში მონაწილეებს საშუალება აქვთ გაიცნონ ერთმანეთი და კავშირები დაამყარონ ახალ ბიზნესწამოწყებებთან ტურიზმის სფეროში.
ფესტივალის სრულ პროგრამას შეგიძლია გაეცნოთ ფესტივალის ვებგვერდზე.
ფესტივალი „ტურისტერი“
