სანიაღვრე არხით დაბინძურებული ზღვა [ვიდეო]

26.06.2018

ბათუმელები/ნეტგაზეთის დამფუძნებელი და დირექტორი მზია ამაღლობელი დააპატიმრეს.
ბათუმელები/ნეტგაზეთი, როგორც დამოუკიდებელი და გავლენებისგან თავისუფალი მედიასაშუალება, რომელიც მზია ამაღლობელმა 2001 წელს დააფუძნა, მიიჩნევს, რომ ის არის რუსული რეჟიმის სინდისის პატიმარი, არ აპირებს შეგუებას, ითხოვს მის დაუყოვნებლივ გათავისუფლებას და აგრძელებს ბრძოლას სიტყვის თავისუფლებისთვის.

ბათუმში ზღვას 20-მდე ღია თუ დახურული სანიაღვრე არხი უერთდება. სანიაღვრე არხად მიიჩნევა ის მდინარეებიც, რომლებიც ქალაქის უბნების გავლით უერთებიან ზღვას [ყოროლისწყალი, ბარცხანა, მეჯინისწყალი]. ამ არხებს ზღვაში დღემდე შეაქვთ სხვადასხვა საყოფაცხოვრებო ნარჩენი. გარდა ამისა, სანიაღვრე არხებსა თუ მდინარეებზე ჯერ კიდევ თვითნებურად აქვთ მოქალაქეებს დაერთებული კანალიზაცია, შესაბამისად, ზღვაში ამ არხებით საკანალიზაციო წყლებიც ჩაედინება.

ბათუმის მერიაში აცხადებენ, რომ სანიაღვრე არხებში წყალს ზოგადად არ სჭირდება გაფილტვრა; კანალიზაციის ახალი სისტემების მშენებლობა კი ითვალისწინებს, რომ საკანალიზაციო და სანიაღვრე წყლები გამიჯნული იყოს და „ამ ინფრასტრუქტურული პროექტით, ასეც კეთდება“.

„სანიაღვრე არხში უნდა ხვდებოდეს მხოლოდ გრუნტის და წვიმის წყლები. თუმცა, ქალაქში ბევ ადგილზე იყო თვითნებური დაერთებები კანალიზაციის ამ სანიაღვრეებზე. ჭაობის დასახლებაში ადრე თვითნებურად ჩართვები ჰქონდა მოსახლეობას კანალიზაციის, რაც გამოვაცალკევეთ. მიმდინარეობს ახალ საკანალიზაციო ქსელზე დაერთებები, რასაც ალბათ, რამდენიმე თვე დასჭირდება. მთელი ქალაქის მასშტაბით ვერ გეტყვით ამ კუთხით დღეს რა მდგომარეობაა, რადგან თვითნებური დაერთებები იდენტიფიცირებულიც კი არ არის ბოლომდე – სად რა და როგორ ხდება. მთავარია, უმეტესი ტერიტორია ქალაქის გადართულია კანალიზაციის ახალ ქსელზე,“ – გვითხრა ბათუმის მერის მრჩეველმა მუნიციპალური ინფრასტრუქტურის რეაბილიტაციის პროექტის საკითხებში, ჯაბა ტუღუშმა.

ბათუმის ერთ-ერთი სანიაღვრე არხი, რომელიც ზღვას საბაგირო გზის სადგურის მიმდებარედ უერთდება, წვიმიან ამინდში მთლიანად აბინძურებს ზღვას პორტის აკვატორიაში.

ვიდეო, რომელზეც ამ არხით დაბინძურებული ზღვა ჩანს, „ბათუმელებმა“ რამდენიმე დღის წინ, 23 ივნისს, გადაიღო:

„აქ [პორტთან] სულაბერიძისა და გიორგი ბრწყინვალეს ქუჩებზე სანიაღვრე არხები, ჯორჯიაშვილის ქუჩის გავლით შედის ზღვაში. ეს არხი მთლიანად განცალკევებულია დღეს საკანალიზაციო ქსელისგან, თუმცა ახალ ქსელზე დაერთება არ არის დასრულებული და ეტაპობრივად მიმდინარეობს. მაგალითად, გიორგი ბრწყინვალეს ქუჩაზე მალე დაიწყება დაერთებები,“ – ამბობს ჯაბა ტუღუში. მისივე თქმით, ამ არხის მიმდებარე უბნებშიც იყო კანალიზაციის თვითნებურად დაერთებები სანიაღრეზე.

ჯაბა ტუღუშის თქმით, ამ დროისთვის სანიაღვე არხი კეთდება ჯავახიშვილის ქუჩაზე. იმის ინდიკატორად, რომ სანიაღვრე და საკანალიზაციო ქსელებიდან წყალი და ფეკალიები ერთმანეთში აღარ ერევა. ჯაბა ტუღუში ადლიის გამწმენდ ნაგებობას ასახელებს, სადაც „ადრე დიდი რაოდენობით შედიოდა მასა ამ გამწმენდ ნაგებობაში ვინაიდან სანიაღვრე წყლები ერეოდა საკანალიზაციო წყლებში, ამჟერად კი ნაკლებია მასა, ანუ მხოლოდ კანალიზაციის წყალი შედის“.