შეფასებისა და გამოცდების ეროვნული ცენტრის ინფორმაციით, დასრულდა აბიტურიენტთა რეგისტრაცია ერთიან ეროვნულ გამოცდებზე.
პირველადი მონაცემებით, 2018 წლის ერთიან ეროვნულ გამოცდებზე 40 ათასზე მეტი აბიტურიენტი დარეგისტრირდა. ცენტრის ინფორმაციით, ამ დროისთვის უნივერსიტეტებში 43 ათას ადგილზეა მიღება გამოცხადებული. „თუმცა უმაღლესი სასწავლებლების ავტორიზაცია-აკრედიტაციის პროცესი ისევ მიმდინარეობს და შესაძლებელია ეს მონაცემები შეიცვალოს“, – გვეუბნებიან გამოცდების ეროვნულ ცენტრში.
2018 წლის გამოცდებზე 4 500-ზე მეტი სტუდენტი საგრანტო კონკურსისთვის დარეგისტრირდა. 12 ათასზე მეტი კი სამაგისტრო გამოცდებზე.
აბიტურიენტებს საშუალება აქვთ 15 მაისის ჩათვლით დაამატონ (ჩაანაცვლონ) საგანი, შეცვალონ ზოგადი უნარების გამოცდის ენა.
ასეთივე ცვლილებები შეუძლიათ მაგისტრანტობის კანდიდატებსაც (ტესტის ტიპის შეცვლა).
ხოლო საგანმანათლებლო პროგრამების არჩევა ან ჩამონათვალში ცვლილების შეტანა აბიტურიენტებს წელს უკვე აპელაციების შედეგის გამოცხადებამდე შეეძლებათ (სავარაუდო თარიღია 15 აგვისტო).
განათლების სამინისტროს ხარისხის განვითარების ეროვნული ცენტრის მონაცემებით, ამ დროისთვის საქართველოში 71 ავტორიზებული უმაღლესი სასწავლებელია.
