მას შემდეგ, რაც ბათუმის საკრებულო ისტორიულ ზონას დაამტკიცებს, ბათუმის მერიამ შესაძლოა ბათუმის ცენტრალურ პარკში არსებულ ნურიგელის ტბისთვის კულტურული მემკვიდრეობის ძეგლის სტატუსის მინიჭება მოითხოვოს. ინიციატივა ბათუმის მერს, ლაშა კომახიძეს ეკუთვნის.
საქმე იმაშია, რომ ბათუმის მერი ისტორიული ზონის „გეოგრაფიკის“ მიერ შეთავაზებული საზღვრების რედაქტირებას ითხოვს. მერის იდეაა, ამ საზღვრებიდან ამოიღონ გორგილაძის ქუჩის ნაწილი და ე.წ. წითელი ზოლი მელიქიშვილის ქუჩაზე გავიდეს, გორგილაძის ქუჩის ნაწილი კი მელიქიშვილის ქუჩიდან ზღვის სანაპირომდე ისტორიულ ზონაში მოექცევა.
მერმა ინიციატივა ქუჩის დანარჩენ ნაწილში უკვე არსებული მაღლივი შენობებითა და მიმდინარე პროექტებით ახსნა: „იქ ისედაც მაღლივი შენობებია და სირთულეებს შევუქმნით მოსახლეობას“.
ლაშა კომახიძის თქმით, მერიის მიზანია, ქალაქს მიეცეს განვითარების სწორი მიმართულება ისტორიული ზონის გარეთ. მან იმედი გამოთქვა, რომ მენაშენეები ახლა უფრო მეტი ინტერესით შეხედავენ ქალაქის სხვა ზონებს.
ამის შესახებ ლაშა კომახიძემ დღეს „დემოკრატიული ჩართულობის ცენტრში“ გამართულ შეხვედრაზე ისაუბრა.
