საკონსტიტუციო სასამართლომ დააკმაყოფილა სარჩელი, რომელიც ასაკობრივ შეზღუდვას ადგენდა მეცნიერებათა აკადემიაში ხელმძღვანელი პოზიციის დაკავების დროს. მოქალაქეები გუჩა კვარაცხელია, გივი ცინცაძე, გიორგი თავაძე და ელიზბარ ჯაველიძე პარლამენტის წინააღმდეგ დაობდნენ. დავის საგანი „მეცნიერებათა აკადემიის შესახებ“ საქართველოს კანონის ის ნორმა იყო, სადაც ეწერა, რომ აკადემიის პრეზიდენტად და ვიცე-პრეზიდენტად არ შეიძლება აირჩეს პირი, რომლის ასაკი 70 წელს აღემატება.
მოსარჩელე მხარის მითითებით, 70 წელს გადაცილებულ ქმედუნარიან, ჯანსაღი ფსიქიკისა და გონებრივი მონაცემების მქონე აკადემიკოსებს, მხოლოდ ასაკიდან გამომდინარე ეზღუდებოდათ აღნიშნული ადმინისტრაციული თანამდებობის დაკავების უფლება. ეს იწვევდა მათ მიმართ დისკრიმინაციულ მოპყრობას. მოპასუხე მხარე კი აღნიშნავდა, რომ ასაკობრივი ზღვარის დაწესება არ ეწინააღმდეგება საქართველოს კონსტიტუციას და სადავო ნორმა ემსახურება მეცნიერებათა ეროვნული აკადემიის ეფექტური ფუნქციონირების უზრუნველყოფას.
საკონსტიტუციო სასამართლომ მიუთითა, რომ არსებობს ლეგიტიმური ინტერესი, უზრუნველყოფილი იყოს ამა თუ იმ სახელმწიფო ფუნქციის სათანადოდ განხორციელება. თუმცა, იმავდროულად, მნიშვნელოვანია ასაკოვანი პირების დაცვა დისკრიმინაციისაგან.
„ფაქტი, რომ, ზოგადად, ასაკის მატების თანმდევი შედეგია ადამიანის ფიზიკური შესაძლებლობების შესუსტება და გარკვეული უნარების დაქვეითება, თავისთავად ვერ გახდება ასაკთან დაკავშირებული ნებისმიერი შეზღუდვის დაწესების საფუძველი… საკონსტიტუციო სასამართლომ აკადემიის ადმინისტრაციული თანამდებობების განხორციელებასთან დაკავშირებული კანონმდებლობის ანალიზის საფუძველზე დაადგინა, რომ ამ თანამდებობებზე საქმიანობის განხორციელება არ არის დაკავშირებული განსაკუთრებულ ფიზიკურ მოთხოვნებთან. მეტიც, მეცნიერებათა ეროვნული აკადემიის სპეციფიკიდან გამომდინარე, დასახელებული ფუნქციების სრულყოფილად შესრულებას, შესაძლოა, განაპირობებდეს კიდეც ასაკის მატებასთან ერთად დაგროვებული ცოდნა, გამოცდილება თუ ინსტიტუციური მეხსიერება,“ – აღნიშნულია საკონსტიტუციო სასამართლოს მიერ გავრცელებულ ინფორმაციაში.
