29 დეკემბერს ქედის მუნიციპალიტეტის საკრებულომ 2018 წლის ადგილობრივი ბიუჯეტი 17 ხმით დაამტკიცა. მუნიციპალიტეტის მომავალი წლის ბიუჯეტი 9 მილიონ 536 900 ლარით განისაზღვრა. ბიუჯეტს მხარი არ დაუჭირა საკრებულოს ოპოზიციამ, რომელმაც არგუმენტად დაფინანსების გარეშე დარჩენილი სოფლის მეურნეობა დაასახელა. ჯერ კიდევ საკითხის კენჭისყრამდე საკრებულოს „ნაციონალური მოძრაობის“ ორმა წევრმა სხდომათა დარბაზი პროტესტის ნიშნად დატოვა.
„2018 წლის ქედის ბიუჯეტი მოსახლეობის კეთილდღეობაზე არ არის ორიენტირებული. ბიუჯეტი მათ კომფორტზეა მორგებული, განსაკუთრებით სოციალურად დაუცველი მოსახლეობა იჩაგრება, რა გააკეთა თვენახევარში ქედის საკრებულომ ისეთი, რომ პრემია მიეღო? 14 შენიშვნიდან არც ერთი არ გაითვალისწინეს, სოფლის მეურნეობის მიმართულებით ვითხოვდით უნიკალური ჯიშების – ვაზის, სუბტროპიკული ხურმისა და თხილის ნერგების შეძენას მოსახლეობისთვის,“ – აცხადებს ვაჟა ბოლქვაძე „ერთიანი ნაციონალური მოძრაობიდან“.
„ხომ შეიძლებოდა სოფლის მეურნეობის მიმართულებით რომელიმე პროგრამა მაინც დაფინანსებულიყო? როგორ შეიძლება სოფლის მეურნეობის განვითარებისთვის ადგილობრივ ბიუჯეტში თანხა არ იყოს გაწერილი მაშინ, როდესაც ამ მუნიციპალიტეტის მოსახლეობის მთავარი შემოსავალი სოფლის მეურნეობაა,“ – განაცხადა საკრებულოს სხდომაზე თემურ ავალიანმა, „ევროპული საქართველოს“ წარმომადგენელმა.
ქედის მერი, ლევან გორგილაძე აცხადებს, რომ ქედის მუნიციპალიტეტს ამ დროისთვის საჭირო ფინანსური და მატერიალური რესურსი არ აქვს, რომ სოფლის მეურნეობის კუთხით მნიშვნელოვანი პროექტები განახორციელოს.
„სოფლის მეურნეობის პროექტები გლობალური საკითხია, თვითმმართველობის კოდექსიდან გამომდინარე ეს არ შედის მუნიციპალიტეტის უფლებამოსილებებში, აქედან გამომდინარე, შესაძლებელია მხოლოდ მისი დელეგირება ან აჭარის, ან საქართველოს მთავრობიდან. ჩვენ ამჟამად არც ფინანსური და არც ადამიანური რესურსი არ გვაქვს იმისთვის, რომ სოფლის მეურნეობის მიმართულებით მნიშვნელოვანი პროექტები განვახორციელოთ. ჩვენ ეს ვინმეს საჩვენებლად რომ გავაკეთოთ, ეს შედეგს არ მოიტანს. ჩვენი ხედვა ასეთია, როდესაც სტრატეგიული გეგმა გაკეთდება და სოფლის მეურნეობის სამინისტროს მიერ შეიქმნება სოფლის მეურნეობის განვითარების გარკვეული პროგრამა, ჩვენ შეიძლება მივიღოთ მონაწილეობა როგორც შემსრულებელმა ორგანიზაციამ, თუ იქნება ამის დელეგირება ჩვენზე.“
