გოდერძის უღელტეხილზე მოძრაობა აკრძალულია – ნამქერში 3 მანქანაა ჩარჩენილი

ქარბუქისა და შეზღუდული ხილვადობის გამო აკრძალულია ყველა სახის ავტოტრანსპორტის მოძრაობა ბათუმი-ახალციზის გზის 106-123 კილომეტრზე – ინფორმაციას საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტი ავრცელებს.

გზების დეპარტამენტის აჭარის დირექციის ხელმძღვანელის, ზურაბ სიხარულიძის ინფორმაციით აჭარის ტერიტორიაზე მოძრაობა აკრძალულია გზის 106-117 კილომეტრზე. ეს არის გოდერძის უღელტეხილი ხულოს მუნიციპალიტეტის ტერიტორიაზე – დაახლოებით, სათხილამურო ტრასიდან ავტონომიური რესპუბლიკის ადმინისტრაციულ საზღვრამდე მონაკვეთი.

„მზიანი ამინდია, თუმცა არის ძლიერი დასავლეთის ქარი, რომელიც არსებული თოვლის ნამქერით ხერგავს გზის სავალ ნაწილს. მობილიზებული იყო შესაბამისი ტექნიკა მთელი ღამის განმავლობაში. ამ დროისთვის სამი მსუბუქი ავტომანქანაა ჩარჩენილი თოვლში და ვმუშაობთ გამოსაყვანად. ავტომანქანებში ადამიანები არ იმყოფებიან“ – ამბობს ზურაბ სიხარულიძე.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com