2016 წლის საატესტატო გამოცდებზე გაცილებით მეტი მოსწავლე ჩაიჭრა, ვიდრე გასულ წელს. შარშან მთელი ქვეყნის მასშტაბით ჩაიჭრა 2 200 მოსწავლე, წელს კი 5 600 მოსწავლე მარტო მათემატიკაშია ჩაჭრილი. ეროვნულ ცენტრს გამოცდებზე ჩაჭრილთა საბოლოო, დაჯამებული ციფრი ჯერ არ აქვს. მას არც იმ კითხვაზე აქვს პასუხი, თუ რატომ გაიზარდა ჩაჭრილთა რაოდენობა მიმდინარე წელს – მიზეზებზე ვერც საჯარო სკოლებში საუბრობენ.
შეფასებისა და გამოცდების ეროვნული ცენტრის ინფორმაციით, 2016 წელს საატესტატო გამოცდებზე 47 ათასი მოსწავლე დარეგისტრირდა. მათ რიცხვში შედიოდნენ ის მოსწავლეები, რომლებიც შარშან ჩაიჭრნენ და ამიტომ საატესტატო გამოცდებზე განმეორებით გავიდნენ.
მათემატიკასა და უცხო ენაში წელს ყველაზე მეტი მოსწავლე ჩაიჭრა. ბათუმის რესურსცენტრის მონაცემებით, ბათუმის სკოლებშიც ჩაჭრილთა უმრავლესობამ სწორედ მათემატიკა და უცხო ენა ვერ ჩააბარა.
19-იდან 11 მოსწავლე ჩაიჭრა, მაგალითად, ბათუმის 29-ე საჯარო სკოლაში. სკოლის დირექტორის, ნური ჯაფარიძის თქმით, მოსწავლეების უმრავლესობა უცხო ენაში (რუსულში) ჩაიჭრა. რამდენიმე კი ორ საგანში, – მათემატიკასა და უცხო ენაში.
დირექტორის აზრით, საატესტატო გამოცდების შედეგების გაუარესების მიზეზი მოსწავლეების მიერ გაკვეთილების ხშირი გაცდენაა. „ბავშვი გაკვეთილზე რომ არ გვესწრება, მასწავლებელს რა უნდა ვუთხრა, რა შენიშვნა უნდა მივცე და რა გადახალისება გავაკეთო. მშობელი უწყობს ამას ხელს. ჩვენს სკოლაში ბავშვმა გაკვეთილს რომ მოუსმინოს, იმ შემთხვევაშიც კი ატესტატი აქვს გარანტირებული. ჩვენ გავაკეთეთ დასკვნა და უკვე დავიწყეთ განგაში ერთი საათის გაცდენაზეც კი“.
82-დან 22 მოსწავლე ჩაიჭრა საატესტატო გამოცდაზე ბათუმის მე-16 საჯარო სკოლაში. ყველაზე მეტი – 19 მოსწავლე მათემატიკაშია ჩაჭრილი. სკოლის დირექტორის შეფასებით, გამოცდის შედეგი შეიძლება განაპირობა მოსწავლის აკადემიურმა მომზადებამ, ან შეიძლება კითხვები იყო უფრო რთული. „ცხადია, ჩვენმა მოსწავლეებმა მათემატიკაში ბევრი არაფერი იციან და აქილევსის ქუსლია ეს ჩვენი განათლების სისტემის“, – გვეუბნება სკოლის დირექტორი, თამთა კვარაცხელია.
დირექტორის თქმით, შარშანდელი ჩაჭრილებიდან წელს ათი მოსწავლე იყო დარეგისტრირებული. მათგან ხუთმა ჩააბარა, ხუთი კი ისევ ატესტატის გარეშე დარჩა.
მე-2 საჯარო სკოლის დირექტორის თქმით, 127 მოსწავლიდან მათთან ცხრა მოსწავლე ჩაიჭრა: „აქედან ერთი შარშანდელია. ყველა მოსწავლე მათემატიკაში ჩაიჭრა“. დირექტორის თქმით, „როგორც ჩანს, გაგვეპარა“, რომ მათემატიკა ზუსტი მეცნიერებაა და სერიოზულ მიდგომას საჭიროებს. მარიზა აბაშიძე ამბობს, რომ ჩაიჭრნენ საშუალო დონის მოსწავლეები და „მათ ზღვარი ყველა ვარიანტში უნდა გადაელახათ“.
პირველი საჯარო სკოლის ინფორმაციით, საატესტატო გამოცდაზე მათთან მხოლოდ სამი მოსწავლე ჩაიჭრა, სამივე მათემატიკაში. „აქედან ერთი მეორედ აბარებდა გამოცდას, ერთი სპეციალური საჭიროების მქონე ბავშვია და მშობელი არ დათანხმდა იმას, რომ სპეციალური პროგრამით ჩაებარებინა გამოცდა, მესამე კი არ გამოცხადდა“.
ბათუმის რესურსცენტრის ინფორმაციით, გასულ წელს მათემატიკაში 7 პროცენტი იყო ჩაჭრილი, წელს კი ეს მაჩვენებელი12 პროცენტზე ავიდა.
„სხვა საგნებში არსებითი ცვლილება არ არის, ქართულში გასულ წელს 1,7 მეათედი პროცენტი ჩაიჭრა, იგივეა წელსაც, გეოგრაფიაში შარშან 1 პროცენტი იყო, წელს – 0,4 პროცენტი ჩაიჭრა. ბიოლოგიაში შარშან იყო 0.6, წელს – 0,7-ია. ცოტათი გაუარესებულია მაჩვენებელი უცხო ენაში. გასულ წელს 4,5 პროცენტი იყო ჩაჭრილი, წელს 7,2 მეათედია ჩაჭრილი“, – ამბობს გოჩა დავითაძე, ბათუმის რესურსცენტრის ხელმძღვანელი.
მისივე თქმით, შედეგებზე პასუხისმგებლობა სკოლასაც ეკისრება: „დირექტორებთან მქონდა შეხვედრა და ითქვა, რომ ეს ყველა ჩვენგანის ბრალია, სწავლის ხარისხი უკეთესი უნდა გვქონდეს. პრობლემაა ისიც, რომ კვალიფიციური პედაგოგების ნაკლებობაა“.
რაც შეეხება აჭარის მუნიციპალიტეტებს – უკეთესი მდგომარეობა არც აქ არის. ქობულეთის რესურსცენტრის ინფორმაციით, მაგალითად, ჯიხანჯურის საჯარო სკოლაში 22 მოსწავლიდან ინგლისურ ენაში თორმეტი მე-12-კლასელი ჩაიჭრა.
გამოცდებისა და შეფასების ეროვნული ცენტრის წინასწარი მონაცემებით, მიმდინარე წელს ქვეყნის მასშტაბით ქართულ ენაში 37 900 აპლიკანტიდან საატესტატო გამოცდებზე 900 ჩაიჭრა, ისტორიაში ტესტირებაზე გავიდა 42 ათასი მოსწავლე, ჩაიჭრა – 2 100, უცხო ენაში 43 ათასი მოსწავლიდან ბარიერი ვერ გადალახა 6 500-მა. 5 600 მოსწავლე ჩაიჭრა მათემატიკაში.
რეგისტრირებულთაგან ათასი მოსწავლე გამოცდებზე საერთოდ არ გამოცხადდა.
შეფასებისა და გამოცდების ეროვნული ცენტრის დირექტორის მოადგილის, ივა მინდაძის განცხადებით, ჩაჭრილი მოსწავლეების ერთი ჯგუფი ბარიერის დაწევას ითხოვს. ივა მინდაძე ამბობს, რომ ეს შეუძლებელია – მინიმალური ზღვარი საატესტატო გამოცდებზე 5,5-ია.
ცენტრის ინფორმაციით, საატესტატო გამოცდების შედეგებიდან გამომდინარე, ეროვნულ გამოცდებს 3000-მდე აბიტურიენტი გამოეთიშა.
