მთავარი,სიახლეები

რა სჭირს გოჩა მელაძეს – ხულოს მერის მოვალეობის შემსრულებლად ყოფილი პოლიციელი დანიშნეს

18.10.2018 • 6406
რა სჭირს გოჩა მელაძეს – ხულოს მერის მოვალეობის შემსრულებლად ყოფილი პოლიციელი დანიშნეს

ხულოს მერის მოვალეობას მუნიციპალიტეტის პოლიციის ყოფილი უფროსი, ვახტანგ ბერიძე შეასრულებს. ხულოს საკრებულოს თავმჯდომარის ჯუმბერ დიმიტრაძის ინფორმაციით, ხულოს მერი, რომლის გადადგომაზეც გუშინ გავრცელდა ინფორმაცია და რომელზეც ამბობდნენ, რომ 31 ოქტომბრამდე შვებულებაში იმყოფებოდა, სამსახურში გუშინ გამოცხადდა, თავისი მოადგილე, ლაშა ბოლქვაძე თანამდებობიდან გაათავისუფლა, მის ნაცვლად ვახტანგ ბერიძის დანიშვნას მოაწერა ხელი და თავადაც დაწერა განცხადება გადადგომაზე.

შესაბამისად, ვახტანგ ბერიძე მერის მოვალეობის შესრულებას შეუდგა და თუ არაფერი შეიცვალა, მერის არჩევნებამდე ის იქნება მოვალეობის შემსრულებელი.

ხულოს საკრებულოს თავმჯდომარე ჯუმბერ დიმიტრაძე გუშინ ამბობდა, რომ არაფერი იცოდა მერის გადადგომაზე. დღეს კი ამბობს, რომ მერის გადაწყვეტილების შესახებ გუშინ საღამოს გაიგო, მას შემდეგ, რაც მისი  განცხადება საკრებულოში შევიდა. გუშინ მერის გადადგომას არავინ ადასტურებდა ოფიციალურად, თუმცა არაოფიციალურად ამბობდნენ, რომ ის გადადგა და არჩეულ მერს იძულებით დააწერინეს განცხადება გადადგომაზე.

ხულოს საკრებულოს თავმჯდომარე გამორიცხავს მერზე ზეწოლას და ამბობს, რომ ხულოს ყოფილი მერი, გოჩა მელაძე სხვა სამსახურში დაინიშნა. ჯუმბერ დიმიტრაძის თქმით, მერმა სწორედ ამიტომ დატოვა არჩევითი თანამდებობა. მისივე ინფორმაციით, გოჩა მელაძე სამუშაოდ შემოსავლების სამსახურში გადავიდა. მოადგილის, ლაშა ბოლქვაძის შესახებ კი არაფერი იცის.

საკრებულოს თავმჯდომარე დადებითად აფასებს ასევე მოვალეობის შემსრულებლად ყოფილი პოლიციელის დანიშვნას: „პოლიციელი აღარ არის უკვე და გამოცდილი პიროვნებაა“.

ხულოს ყოფილი მერი და მისი ყოფილი მოადგილე ლაშა ბოლქვაძე ორი დღეა ტელეფონს არ პასუხობენ.

გოჩა მელაძე აჭარის ყოფილი მთავრობის თავმჯდომარის ზურაბ პატარაძის კადრი იყო. ინფორმაცია იმის შესახებ, რომ გოჩა მელაძეს აუცილებლად მოუწევდა თანამდებობის დატოვება, მას შემდეგ გავრცელდა, რაც თორნიკე რიჟვაძე დაინიშნა აჭარის მთავრობის თავმჯდომარედ.

კანონით, არჩეული მერის გადაყენების უფლება არავის აქვს.

ხულოს არჩეული მერი გადადგა – ხელისუფლება ინფორმაციას არ ასაჯაროებს

გადაბეჭდვის წესი


ასევე: