„რესპუბლიკური საავადმყოფოს“ ექიმების წერილი პატარაძეს და მინისტრის განმარტება

ბათუმის რესპუბლიკური საავადმყოფოს ექიმებმა აჭარის მთავრობის თავმჯდომარეს წერილობით მიმართეს. ერთ-ერთი ექიმი „ბათუმელებთან“ ამბობს, რომ ისინი კატეგორიულად მოითხოვენ, არ გასხვისდეს საავადმყოფო, მათ შორის, მართვის უფლება. აჭარის ჯანდაცვის მინისტრმა, ზაალ მიქელაძემ „ბათუმელებთან“ 22 ნოემბერს აღნიშნა, რომ მიმდინარეობს მოლაპარაკება რესპუბლიკური საავადმყოფოს მართვის უფლების გასხვისებაზე.

ამ საავადმყოფოს 100-პროცენტიანი წილი აჭარის ავტონომიურ რესპუბლიკას ეკუთვნის.

„სტატიის გამოქვეყნებამდე გვეუბნებოდნენ, რომ არაფერიც არ გასხვისდებოდა. ამიტომაც ჩვენ შევხვდით ზურაბ პატარაძეს და ვუთხარით, რომ ეს არ არის სახელმწიფოებრივი მიდგომა. მივიღეთ დაპირება, რომ მართვის უფლების მთლიანად გადაცემა არ განიხილებოდა. ტექნიკის შესაძენად ისევ არაა თანხა გამოყოფილი და ბევრი კითხვა არსებობს. წერილს 350 ექიმი აწერს ხელს. ზურაბ პატარაძეს მივმართეთ იმისთვის, რომ ოფიციალურად წერილობით დასტურდებოდეს ის, რასაც ვაკეთებთ,“ – გვითხრა „რესპუბლიკური საავადმყოფოს“ ერთ-ერთმა ექიმმა, რომელმაც ვინაობის გამხელა არ ისურვა.

„მოლაპარაკებები ისევ გრძელდება, სიახლე ამ ეტაპზე არ გვაქვს,“ – ამბობს ზაალ მიქელაძე, აჭარის ჯანმრთელობის და სოციალური დაცვის მინისტრი. მისი თქმით, ის ექიმებს შეხვდა და ესაუბრა მართვის წილის გასხვისების აუცილებლობაზე. მინისტრი ინფორმირებულია იმაზეც, რომ ექიმებმა წერილი ზურაბ პატარაძეს მიწერეს.

რას ფიქრობს რესპუბლიკური საავადმყოფოს გასხვისებასთან დაკავშირებით თავად ზურაბ პატარაძე. აჭარის მთავრობის პრესცენტრში „ბათუმელებს“ უთხრეს, რომ მთავრობის პოზიციას ჯანდაცვის მინისტრი დააფიქსირებდა. ზაალ მიქელაძემ კი შემდეგი განმარტა:

„როგორც ჩანს, მათ მაინც უნდათ, რომ პასუხი მიიღონ მთავრობის თავმჯდომარისგან. მე ავუხსენი, რომ რეალურად არის საჭირო ეს, რადგან ჩვენ გვჭირდება საავადმყოფოს მართვაში ორგანიზაცია, რომელსაც აქვს საუნივერსიტეტო კლინიკის მართვის გამოცდილება. რეალურად ეს არის პრობლემა. ბათუმის სახელმწიფო უნივერსიტეტის სამედიცინო ფაკულტეტსაც შეექმნება აკრედიტაციის პრობლემა 2021 წელს, თუკი მას არ ექნება საბაზისო კლინიკა. ამ კუთხით მიმდინარეობს მოლაპარაკება. მთლიანად მართვის უფლების გადაცემაზე არც ადრე იყო საუბარი. ექიმების დიდი ნაწილი მხარს უჭერს ამ იდეას, ვიღაც ამის წინააღმდეგია ისევ. რეალურად ძალიან მტკივნეულად აღიქვამენ ექიმები, როცა გასხვისებაას ახსენებენ“.

რატომ არ არის ისევ ახალი საავადმყოფოს ტექნიკის შეძენაზე თანხა გამოყოფილი? – აჭარის ჯანდაცვის მინისტრის თქმით, ჯერ კიდევ უნდა დაზუსტდეს, რის საჭიროება არსებობს.

„ჩვენ ველოდებით ამ მონაცემს კლინიკისგან. არსებული შპს ეკუთვნის სამინისტროს, მაგრამ ახალი „რესპუბლიკური საავადმყოფოს“ მართვისთვის მომავალი წელს ახალი შპს უნდა შეიქმნას. ამჟამად ახალ „რესპუბლიკურ საავადმყოფოს“ შპს „ბათუმის სტადიონი“ მართავს, მაგრამ ამ შპს-ს დაქვემდებარებაში ხომ ვერ იქნება კლინიკა, როცა მშენებლობა საბოლოოდ დასრულდება? ჩვენ ვიცით, რომ ტექნიკას დაახლოებით 15-20 მილიონი ლარი დასჭირდება და ეს ფინანსური რესურსი არსებობს“.

 

 

ნეტგაზეთის მასალების სხვა გამოცემებში გადაბეჭდვის წესი


ავტორი