Batumelebi | როგორ გაგრძელდება „ევექსის“ საქმე როგორ გაგრძელდება „ევექსის“ საქმე – Batumelebi
RU | GE  

როგორ გაგრძელდება „ევექსის“ საქმე

 

გადარჩებოდა თუ არა ცივი იარაღით დაჭრილი 25 წლის მამაკაცი შუახევის საავადმყოფოში მისთვის დროული დახმარება რომ აღმოეჩინათ? -ექსპერტიზის დასკვნა ჯერჯერობით მზად არ არის.

რა შეიძლება მოხდეს, თუ დასკვნაში ჩაიწერება, რომ პაციენტი გადარჩებოდა? – მოვლენების შესაძლო განვითარებაზე `ბათუმელებს~ რეგულირების სააგენტოს კონტროლის დეპარტამენტის ხელმძღვანელმა ნინო ხუციშვილმა უპასუხა.

 

 

შუახევის რაიონული ჰოსპიტალი

 

 

ქალბატონო ნინო, რა ეტაპზეა საქმის შესწავლა და ამ დროის ინფრომაციით, იკვეთება თუ არა ბრალეულობის ნიშნები?

 

 ამ ეტაპზე, რაც სააგენტომ ადგილზე შეისწავლა, გამოვლინდა სანებართვო პირობების დარღვევა. კომისიამ დაწესებულების მიმართ შეადგინა ადმინისტრაციულ სამართალდარღვევათა ოქმი და კანონმდებლობის შესაბამისად შუახევის სასამართლომ დაწესებულება 10 000 ლარით დააჯარიმა.

 

 გამოიწვია თუ არა პაციენტის სიკვდილი ექიმის ადგილზე არ ყოფნამ?

 

 მიზეზ-შედეგობრივი კავშირის დადგენა სასამართლო – სამედიცინო ექსპერტიზის კომპეტენციაა. ექსპერტიზა ჩატარებულია, თუმცა ჯერ დასკვნა არ არის მზად. ჩვენ უკვე მივმართეთ სამართალდამცავ ორგანოებს, რომ როგორც კი დაიდება დასკვნა, მოგვაწოდონ. თუმცა შესაძლებელია ამ დასკვნის საფუძველზეც კი ვერ გაირკვეს, გამოიწვია თუ არა პაციენტის სიკვდილი საავადმყოფოში ექიმის არყოფნამ და საჭირო გახდეს კომისიური ექსპერტიზა.

 

რა შეიძლება მოხდეს, თუ დადგინდება, რომ დროული დახმარების მიღების შემთხვევაში პაციენტი გადარჩებოდა?

 

ამის შემდეგ რა მოხდება, ეს უკვე სასამართლოს თემაა. რამდენადაც მე ვიცი, სისხლის სამართლის საქმეა აღძრული. დაწესებულებას ჩვენ ყოველდღიურად ვაკონტროლებთ, კანონმდებლობა განმეორებითი დარღვევების შემთხვევაში ისევ დაჯარიმებას ითვალისწინებს. ბრალეულობის დადასტურების შემთხვევაში, ოჯახი კომპენსაციას თუ მოითხოვს, ეს უკვე სასამართლოს თემაა.

ნეტგაზეთის მასალების სხვა გამოცემებში გადაბეჭდვის წესი
ცაგო კახაბერიძე