კვირის ამბები

ბათუმში ექსპერიმენტული მუსიკის ფესტივალი იწყება

24.04.2014 • 1374
ბათუმში ექსპერიმენტული მუსიკის ფესტივალი იწყება

 

„SoundSpring“   წელს პირველად იმართება. ფესტივალი მოიცავს საგანმანათლებლო (ლექციები, ვორქშოპები) და პერფორმატიულ (მუსიკა, ვიდეო ) სეგმენტებს. ფესტივალში მონაწილეობას  გოგი ძოძუაშვილი, ირაკლი შონია,  ჟორჟიკა, გაჩა, რეზო ღლონტი, ლევან მაისურაძე, ტეტე, გიორგი სამსონია, ქუჯი დავითულიანი, ირაკლი აბრამიშვილი მიიღებენ.

 

ფესტივალზე  ბილეთები არ გაიყიდება, დასწრება თავისუფალია. ნებისმიერ მსურველს შეუძლია მისვლა, ლექციებზე დასწრება  და მუსიკის მოსმენა.  ლექციებზე  საუბარი მუსიკასთან დაკავშირებულ თემებზე იქნება. იმაზე თუ რა მნიშვნელობა აქვს ექსპერიმენტულ ხელოვნებას და მუსიკას საზოგადოებისთვის.

 

„SoundSpring“ ორგანიზაცია „Micro-ფონი“-ს მიერაა ორგანიზებული. ფესტივალის ორგანიზატორის ლევან ხუჯაძის თქმით „SoundSpring“ -ის საორგანიზაციო მხარე ისევე როგორც შინაარსი ექსპერიმენტულია.

 

„პირველად ვაკეთებთ და იმედია ექსპერიმენტი კარგად ჩაივლის. ფესტივალი კი უფასოა, მაგრამ მაინც გათვლილია გარკვეული კატეგორიის მსმენელზე, მელომანებზე,  მუსიკოსებზე და მუსიკათმცოდნეებზე. ფესტივალზე მონაწილე შემსრულებლები წარმოადგენენ იმ არტისტებს რომლებიც დღეს ქმნიან თანამედროვე მუსიკას. ფესტივალი მოგვცემს საშუალებას ჩვენც გავიგოთ რა მდგომარეობაა დღეს ამ მხრივ საქართველოში და თუნდაც მსოფლიოში. თუ როგორი მუსიკა იქმნება, რა მიმართულებით ვითარდება (ამ შემთხვევაში ჩვენ ავირჩიეთ თანამედროვე მუსიკის ელექტრონული ფორმატი). იმისთვის რომ შექმნა ახალი საჭიროა შრომა, ძიება და ექსპერიმენტი. თუ ხელოვნება არ ვითარდება ის განიცდის სტაგნაციას. ეს კი პირდაპირ აისახება ხოლმე საზოგადოებაზე,“ – ამბობს „SoundSpring“ -ის ორგანიზატორი ლევან ხუჯაძე.

 

„SoundSpring“   სამ დღეს გაგრძელდება და  ანბანის კოშკის მიმდებარედ Miracle parck-ში მდებარე გალერეა 41/41-  ში გაიმართება. 

 

გადაბეჭდვის წესი