სპორტი

ბათუმში საერთაშორისო სტანდარტების რაგბის მოედანი შენდება

24.07.2015 • 3910
ბათუმში საერთაშორისო სტანდარტების რაგბის მოედანი შენდება

 


სტადიონის მშენებლობა ქართუ ჯგუფმა 2014 წლის მარტში დაიწყო და მისი დასრულება წლის ბოლომდეა გათვლილი.


ამ დროისთვის მიმდინარეობს ტრიბუნის, ღობის, მოედნების, სადრენაჟო სისტემების მოწყობა-მოპირკეთება და გადახურვის სამუშაოები. პარალელურად მიმდინარეობს შიდა ელექტრო და სანტექნიკური სამუშაოები.


სტადიონის ირგვლივ შენობაში განთავსდება ადმინისტრაციული ნაწილი, საშხაპეები და აუზები. მოედნები იქნება განათებული ევროპული ხარისხის განათებებით, სადაც ღამითაც კი ნებისმიერი დონის თამაში ჩატარდება.


მიმდებარე ტერიტორიაზე ეწყობა ავტოსადგომი 220 მანქანისთვის, კეთილმოწყობილი ბორდიურებითა და გამწვანებით.


სამშენებლო სამუშაოებზე დასაქმებულია 60 ადგილობრივი ადამიანი. ორ კვირაში დაიწყება შიდა და გარე ფასადების მოპირკეთება, რომლის დროსაც დასაქმებულთა რაოდენობა გაორმაგდება.



დღეს ობიექტზე მიმდინარე სამუშაოებს აჭარის მთავრობის თავმჯდომარე არჩილ ხაბაძე გაეცნო.


„ქალაქში შენდება ევროსტანდარტების რაგბის სტადიონი, როგორც კომპანიის წარმომადგენლები აცხადებენ 2016 წლის ბოლომდე ობიექტი ჩაბარდება. მობილიზებულია მთავარი ძალები და მშენებლობის ტემპი ნორმალურია. ბაზა სამომავლოდ ითვალისწინებს სასტუმრო კომპლექსის მოწყობასაც. ეს პროექტი სპორტის მიმართულებით ძალიან მნიშვნელოვანი ნაბიჯია და საქართველოში ერთ-ერთ ყველაზე განვითარებულ სპორტის სახეობას, ბათუმს ექნება ღირსეული მოედანი და ბაზა სპორტსმენებისთვის“ – თქვა აჭარის მთავრობის თავმჯდომარე არჩილ ხაბაძემ.


მთავრობის თავმჯდომარეს რაგბის მოედანზე მიმდინარე პროცესები სამუშაოების ხელმძღვანელმა სოსო ბოლქვაძემ და ასოციაცია „ატუ“-ს წარმომადგენელმა ნუკრი ღლონტმა გააცნეს.


პროექტის მთლიანი ღირებულება 7 775 988 ლარს შეადგენს. ამ ეტაპისთვის შესრულებულია 1 800 00 ლარის ღირებულების სამუშაოები.



გადაბეჭდვის წესი