Batumelebi | საერთაშორისო სემინარი თბილისში საერთაშორისო სემინარი თბილისში – Batumelebi
RU | GE  

საერთაშორისო სემინარი თბილისში

გასულ კვირას თბილისმა ტაეკვონდოში საერთაშორისო სემინარს უმასპინძლა, რომელიც ქართველ მწვრთნელთა და მსაჯთა კვალიფიკაციის ასამაღლებლად მოეწყო. საქართველოს ტაეკვონდოს ეროვნული ფედერაციის მოწვევით, სემინარი აზერბაიჯანელმა საერთაშორისო კლასის მსაჯმა, კუკივონის (მსოფლიოს ტაეკვონდოს ფედერაციის აკადემია) ატესტირებულმა საერთაშორისო ინსტრუქტორმა, კიორუგუშისა (ორთაბრძოლები) და პუმსეს (ტექნიკის დემონსტრიება) IV დანის მფლობელმა ეცებარ იბრაჰიმოვმა ჩაატარა. სემინარი აჭარიდან სტატიის ავტორთან ერთად აკაკი ცენტერაძემ, გიორგი მაძღარაშვილმა და ელინა ჯაიანმა გაიარეს.

”ბათუმელებმა” კომენტარი საქართველოს ტაეკვონდოს ეროვნული ფედერაციის ტექნიკურ დირექტორს ავთანდილ მიქაძესა და ეცებარ იბრაჰიმოვს სთხოვა.


ავთანდილ მიქაძე: თავდაპირველად მინდა აღვნიშნო, რომ საერთაშორისო სემინარი საქართველოში აქამდე არ ჩატარებულა და პირველი ნაბიჯი გადავდგით. სემინარი პირველ რიგში მწვრთნელთა და მსაჯთა კვალიფიკაციის ამაღლებას ემსახურება. დარწმუნებული ვარ, ქართველი მსაჯები, რომლებიც აქამდე მხოლოდ საქართველოს ტურნირებს მსაოჯბდნენ, მალე გაიკვალავენ გზას ევროპისა და მსოფლიო ტურნირებისკენ, საერთაშორისო კლასის არბიტრებად ჩამოყალიიბდებიან და ჩვენს ეროვნულ ნაკრებს ჩემპიონატებზეც გაჰყვებიან, ასე რომ, თუ აქამდე ვიჩაგრებოდით, ამიერიდან ასე აღარ მოხდება. ამჟამად 30-მდე მწვრთნელმა და მსაჯმა გაიარა ეს სემინარი, ამათგან შევარჩევთ გარკვეულ ჯგუფს, რომელსაც გავგზავნით საზღვარგარეთ სტაჟირების ასამაღლებლად.

ეცებარ იბრაჰიმოვი: პირველ რიგში, მადლობა მინდა მოოვახსენო ქართულ მხარეს, რათა სემინარის ჩასატარებლად მომიწვია. არ დაგიმალავთ და, დონე ჯერ საკმაოდ დაბალია, თუმცა, მონდომებასა და ენთუზიაზმს ვხედავ. არიან აქ ისეთი ბიჭები, ვისაც საზღვარგარეთ ნაბრძოლი აქვთ და გარკვეული გამოცდილებაც აქვთ მიღებული. დარწმუნებული ვარ, თუკი სათანადოდ იმუშავებენ საკუთარ თავზე, მათგან მაღალი კლასის მსაჯები დადგებიან. სამომავლოდ უფრო მასშტაბური სემინარის ჩატარებას ვგეგმავთ და არ არის გამორიცხული, ჩემთან ერთად საქართველოს სხვა მაღალი კლასის მსაჯებიც ესტუმრნონ.

სემინარის დასასრულს მონაწილეებს შესაბამისი სერთიფიკატები გადაეცათ.

 

ნეტგაზეთის მასალების სხვა გამოცემებში გადაბეჭდვის წესი
ირაკლი დარცმელიძე