კადიროვს თირკმლები გაეთიშა – უკრაინული მედია

უკრაინული მედიის ცნობით, ჩეჩნეთის ლიდერის, რამზან კადიროვის ჯანმრთელობის მდგომარეობა გაუარესდა.

აღნიშნულ ინფორმაციას მედია უკრაინის მთავარი სადაზვერვო სამმართველოს წყაროებზე დაყრდნობით ავრცელებს.

დაუდასტურებელი ინფორმაციით, კადიროვი, სავარაუდოდ, ჩეჩნეთში, საკუთარ საავადმყოფოში იმყოფება და მის სანახავად ოჯახის წევრები, მათ შორის უცხოეთიდანაც, მივიდნენ.

უკრაინული გამოცემა РБК-Украина თავის წყაროებზე დაყრდნობით წერს, რომ კადიროვს თირკმლები გაეთიშა და კრემლი მის შემცვლელს ეძებს. აქამდე გავრცელებული ინფორმაციით, მის მემკვიდრედ რამზან კადიროვი შვილს, ადამ კადიროვს მოიაზრებს.

აქვე – ეს პირველი შემთხვევა არ არის, როცა მედიაში ინფორმაცია ვრცელდება რამზან კადიროვის ჯანმრთელობის მძიმე მდგომარეობის შესახებ.

რუსულ მედიაში ჯერჯერობით არ ვრცელდება ინფორმაცია კადიროვის ჯანმრთელობის მდგომარეობის შესახებ. აქტიურია კადიროვის ტელეგრამ გვერდიც, სადაც ბოლო ტექსტი დღეს, 11 იანვარს გამოქვეყნდა.