რუსეთი ადასტურებს, რომ ლვოვის რეგიონში „ორეშნიკით“ განახორციელა დარტყმა

დღეს, 9 იანვარს, რუსეთის თავდაცვის სამინისტრომ დაადასტურა, რომ უკრაინის წინააღმდეგ განხორციელებული დარტყმა სარაკეტო სისტემა „ორეშნიკიდან“ მოხდა.

8 იანვარს, ღამით, ლვოვში საჰაერო თავდასხმის განგაშის გამოცხადების შემდეგ აფეთქებების ხმა გაისმა. მოგვიანებით გავრცელდა ინფორმაცია, რომ რეგიონში კრიტიკულად მნიშვნელოვანი ინფრასტრუქტურული ობიექტი დაბომბეს.

„რუსეთის შეიარაღებულმა ძალებმა უკრაინაში კრიტიკული სამიზნეების წინააღმდეგ მასშტაბური დარტყმა განახორციელეს ხმელეთზე და ზღვაზე განლაგებული, შორ მანძილზე მოქმედი, სახმელეთო და საზღვაო ზუსტი იარაღის გამოყენებით, მათ შორის „ორეშნიკის“ საშუალო მანძილზე მოქმედი სახმელეთო სარაკეტო სისტემის, ასევე სადესანტო დრონების გამოყენებით“, – ციტირებს რუსული ახალი ამბების სააგენტო „ტასი“ რუსეთის თავდაცვის სამინისტროს ოფიციალურ პასუხს.

რუსეთი აცხადებს, რომ ეს დარტყმა ნოვგოროდში რუსეთის პრეზიდენტის რეზიდენციაზე თავდასხმის პასუხი იყო. შეგახსენებთ, რომ რუსეთმა 29 დეკემბერს პუტინის რეზიდენციაზე თავდასხმის შესახებ განაცხადა. უკრაინა ამ ბრალდებებს უარყოფს.

უკრაინის საგარეო საქმეთა მინისტრი, ანდრეი სიბიგა X-ზე წერს, რომ რუსეთის მიერ ლვოვის რეგიონში, ევროკავშირისა და ნატოს საზღვრებთან ახლოს, „ორეშნიკის“ ტიპის სარაკეტო დარტყმა ევროპის უსაფრთხოებას საფრთხეს უქმნის.

„ევროკავშირისა და ნატოს საზღვართან ასეთი დარტყმა ევროპის კონტინენტზე უსაფრთხოებისთვის სერიოზულ საფრთხეს წარმოადგენს და ტრანსატლანტიკური საზოგადოების გამოცდას წარმოადგენს. ჩვენ რუსეთის დაუფიქრებელ ქმედებებზე რეაგირებას მოვითხოვთ“, – წერს სიბიგა და დასძენს, რომ უკრაინა აშშ-სა და მის ევროპელ პარტნიორებს თავდასხმის დეტალების შესახებ აცნობებს.

სიბიგა გაეროს უშიშროების საბჭოსა და უკრაინა-ნატოს საბჭოს სასწრაფო სხდომის ინიციატივით გამოდის.

საგარეო საქმეთა მინისტრმა „აბსურდული“ უწოდა რუსეთის მტკიცებას, რომ უკრაინის მასიური დაბომბვა პუტინის რეზიდენციაზე უკრაინის დრონებით სავარაუდო თავდასხმის საპასუხო ქმედებაა.

„აბსურდულია, რომ რუსეთი ცდილობს ამ დარტყმის გამართლებას პუტინის რეზიდენციაზე ყალბი „თავდასხმით“, რაც არასდროს მომხდარა. ეს კიდევ ერთი დასტურია იმისა, რომ მოსკოვს არ სჭირდება რეალური მიზეზები ტერორისა და ომისთვის.

…პუტინი საკუთარი ჰალუცინაციების საპასუხოდ რაკეტებს ევროკავშირისა და ნატოს საზღვართან იყენებს – ეს ნამდვილად გლობალური საფრთხეა. და ის გლობალურ რეაგირებას მოითხოვს“ – წერს ის.

„ორეშნიკი“ რუსეთის ახალი ბალისტიკური რაკეტაა. რუსეთმა ის უკრაინის წინააღმდეგ პირველად 2024 წლის 21 ნოემბერს გამოიყენა ქალაქ დნეპრში.

___________________

ფოტო: „ტასი“