დღეს, 27 ივლისს, ქობულეთში დააკავეს სპორტსმენი, „ქართული ოცნების“ ყოფილი წევრი ლუკა კურტანიძე.
ლუკა კურტანიძის ყოფილი ცოლი, ხათუნა მიქაცაძე ამბობს, რომ კურტანიძე მას ფიზიკურად გაუსწორდა პოლიციელების თვალწინ.
კადრებში, რომელსაც TV პირველი ავრცელებს, ჩანს, როგორც ცდილობს კურტანიძე ფიზიკურ თავდასხმას ქალზე. მის შეჩერებას რამდენიმე კაცი ცდილობს.
კადრებშივე ჩანს, რომ ადგილზეა საპატრულო პოლიციის ეკიპაჟი. აქვე ისმის მიქაცაძის ხმა, რომელიც პოლიციელს ეკითხება, რატომ არ აკავებენ მოძალადეს. გარდა ამისა, ქალი ამბობს, რომ პოლიციელმა მისი ტელეფონიდან წაშალა ძალადობის ამსახველი ვიდეო.
„ბათუმელებს“ შს სამინისტროში უთხრეს, რომ გამოძიება საქართველოს სისხლის სამართლის კოდექსის 126-ე პრიმა [ოჯახში ძალადობა] და 381-ე პრიმა [შემაკავებელი ორდერით გათვალისწინებული მოთხოვნების ან/და ვალდებულებების შეუსრულებლობა] მუხლებით მიმდინარეობს.
„ეს არ არის არც პირველი, არც მეორე, არც მესამე, არც მეოთხე, არც მეხუთე, არც მეათე შემთხვევა. ყველა ჯერზე, როდესაც მივმართე პოლიციას, მეუბნებოდნენ, რომ იმიტომ, რომ ელდარ კურტანიძეა, მოდი ნუ გავწირავთ და მოდი, შემოვიფარგლოთ ფსიქოლოგიური ძალადობით. იმედს ვიტოვებ, რომ ახლა, ამ პროცესში, როცა პოლიციის თანამშრომლებიც კი დაესწრნენ ამ ფიზიკურ ძალადობას, ფსიქოლოგიურ ძალადობას ვეღარ იტყვიან […]
ლუკა კურტანიძეს. მოახლოება აქვს სასამართლო გადაწყვეტილებით აკრძალული. 9-თვიანი დამცავი ორდერია მის მიმართ გამოწერილი. მოახლოება აქვს აკრძალული […] მისამართი ვუთხარი საპატრულო ეკიპაჟს, სად იდგა ელდარ კურტანიძის მანქანა და ნაცვლად იმისა, რომ იქ მისულიყო, მოვიდნენ [ჩემთან] და წამობრძანდით, უნდა გამოგკითხოთო […]
ეს ადამიანი იმუქრება, რომ მე ვარ მთავრობა, მე ვარ სახელმწიფო და სახელმწიფოს უპირისპირდებიო. მუხლები მაქვს დაზიანებული, ხელზე მაქვს [დაზიანებები]”, – ამბობს ხათუნა მიქაცაძე.
ნახეთ დეტალურად:
