გერმანიის კანცლერმა, ფრიდრიხ მერცმა განაცხადა, რომ გერმანია მზადაა შეიძინოს აშშ-სგან Patriot-ის საჰაერო თავდაცვის სარაკეტო სისტემები უკრაინისთვის.
მერცმა ამის შესახებ 10 ივლისს, რომში, უკრაინის რეკონსტრუქციისადმი მიძღვნილ კონფერენციაზე განაცხადა.
„დოიჩე ველეს“ ცნობით, მერცმა აღნიშნა, რომ ეს საკითხი ერთი კვირის წინ განიხილა აშშ-ის პრეზიდენტთან, დონალდ ტრამპთან. მისი თქმით, აშშ-ისა და გერმანიის თავდაცვის მინისტრები ამ საკითხზე მოლაპარაკებებს აწარმოებენ, მაგრამ საბოლოო გადაწყვეტილება ჯერ არ არის მიღებული.
მერცმა არ დააკონკრეტა, რამდენი სისტემის შეძენას გეგმავს გერმანია. მედიის ცნობით, მოლაპარაკება ორი სისტემის შეძენას ეხება.
2 ივლისს მედიაში გავრცელდა ინფორმაცია, რომ შეერთებულმა შტატებმა ნაწილობრივ შეაჩერა იარაღის მიწოდება უკრაინისთვის, მათ შორის: Patriot-ის სისტემისთვის განკუთვნილი გამანადგურებელი რაკეტების, Stinger-ის საჰაერო თავდაცვის სისტემების, NASAMS-ის საჰაერო თავდაცვის სისტემისთვის განკუთვნილი რაკეტებისა და F-16 გამანადგურებლების.
მოგვიანებით დონალდ ტრამპმა განაცხადა, რომ შეერთებული შტატები აგრძელებდა უკრაინისთვის სამხედრო დახმარების გაწევას.
7 ივლისს ტრამპმა განაცხადა, რომ შეერთებული შტატები უკრაინას მეტ იარაღს მიაწვდის, ძირითადად თავდაცვისთვის.
