10 ივლისის ღამეს რუსეთმა მასშტაბური თავდასხმა განახორციელა უკრაინის დედაქალაქზე, კიევზე, რუსული დრონებითა და ბალისტიკური იარაღით.
უკრაინული მედიის ცნობით, კიევში აფეთქებები ისმოდა, არის მსხვერპლი, გაჩნდა ხანძარი.
ბოლო ცნობების თანახმად, რუსეთის თავდასხმის შედეგად კიევში ორი ქალი დაიღუპა. რუსული დრონები კიევში, შევჩენკოვის რაიონში ხუთ და თორმეტსართულიან შენობებს მოხვდა, დაღუპულები შენობების ზედა სართულებზე ცხოვრობდნენ.
თავდასხმის შედეგად დაშავდა სულ მცირე 19 ადამიანი. დაშავებულთა რაოდენობა ჯერ ისევ ზუსტდება.
უკრაინის პრეზიდენტის, ვოლოდიმირ ზელენსკის განცხადებით, 10 ივლისის ღამეს რუსმა ოკუპანტებმა უკრაინის მიმართულებით 18 რაკეტა და დაახლოებით 400 დრონი გაუშვეს, რომელთა სამიზნე ძირითადად დედაქალაქი და კიევის რეგიონი იყო.
____________
ფოტოზე: კიევი, 10 ივლისი, 2025 წელი
