თურქეთში მესამე დღეა ებრძვიან ტყის ხანძარს სხვადასხვა ადგილას, რომელთა ჩაქრობასაც ქარიანი ამინდი აძნელებს.
თურქული მედიის ცნობით, ქარის გამო ხანძარი დიდ ტერიტორიებზე გავრცელდა, რის შემდეგაც არაერთი დასახლების პრევენციული ევაკუაცია გახდა საჭირო.
ხანძარია დასავლეთ იზმირის პროვინციასა და სამხრეთ ჰატაის პროვინციაში მდებარე ტყეებში. მეხანძრეები 24-საათიან რეჟიმში მუშაობენ, სახმელეთო და საჰაერო ტექნიკით.
მუღლას სამხრეთ-დასავლეთ პროვინციაში თურქეთის ჟანდარმერიამ გააძლიერა პატრულირება ტყიან ადგილებში, ტემპერატურის მატებისა და ძლიერი ქარის პირობებში ხანძრის გაზრდილი რისკის გამო.
ხელისუფლება მოსახლეობას აფრთხილებს, არ დაანთონ ცეცხლი და არ გამოიყენონ ფეიერვერკი.
სინოპტიკოსები მარმარილოს, ეგეოსისა და ხმელთაშუა ზღვის რეგიონების დიდ ნაწილში ქარის კიდევ უფრო გაძლიერებას ვარაუდობენ, რაც ხანძრის ახალი კერების გაჩენის საფრთხეს ზრდის.
ინფორმაცია მსხვერპლის შესახებ არ ვრცელდება.
________________
ფოტოზე: ტყის ხანძარი იზმირის პროვინციაში. ფოტო: ევროპის პრესფოტო სააგენტო. EPA/MURAT KOCABAS
