მწერალმა ნაირა გელაშვილმა მაუწყებლის პოდკასტში ისაუბრა, რას ნიშნავს მისთვის ჟურნალისტისა და მედიამენეჯერის, მზია ამაღლობელის სილა ბათუმის პოლიციის უფროსის, ირაკლი დგებუაძისადმი და რაზე მიუთითებს დგებუაძის რეაქცია.
„აი, წარმოიდგინეთ მზია ამაღლობელის შემთხვევა. ქალმა სილა გამაკრაო და ამაზე კაცი ჩივის…
პირველ რიგში ხომ კაცი ხარ, ვიდრე პოლიციელი გახდები. პირველ რიგში ხომ ადამიანი ხარ, მამაკაცი ხარ და რაინდი ხარ.
ეს არა თუ საქართველოს ტრადიციაში, ამ ფსიქოლოგიაში არის სრულიად ახალი მოვლენა, არამედ მთელი კავკასიის.
ეს ბატონი დგებუაძე შევა ქრესტომათიულ მაგალითად, რომელიც უნდა ისწავლებოდეს სკოლებში, როგორც ხდება მამაკაცში მამაკაცური საწყისის გაქრობა, თუმცა ის გარეგნულად შეიძლება გამოიყურებოდეს ძალიან კუნთმაგარ და ძლევამოსილ ჭაბუკად, მაგრამ მას რაინდობის არაფერი არ გააჩნია.
რანაირად შეიძლება დასუსტებული ქალი, რომელსაც მანამდე შენ შეურაცხყოფას აყენებდი, ამცირებდი ყველანაირად და მან, ღირსებაშელახულმა, დასუსტებული ხელი გამოგიქნია და სამი თითი ნიკაპზე მოგხვდა და ქვეყანა შეყარე, რომ მეტკინა, ლოყა ამიწითლდა და ამიტომ უნდა ვუჩივლო და ექვსი წლით ციხეში ჩავსვა…
ვისაც ეს არ ესმის, რა მორალური კატასტროფაა ეს თვითონ ბატონი დგებუაძისთვის და მისი მეგობრისთვის, რომელიც ამბობდა – „როგორ არა, ისეთი ძლიერი სილა გააწნა“ და სირცხვილის განცდა არა აქვთ.
ეს ნიშნავს, რომ ამ კაცში მამაკაცური თვითშეგრძნება არის განადგურებული. ის ვერ გრძნობს, რომ ის კაცია და ეს ქალია. ეს სერიოზული პრობლემაა. ჩვენი ცივილიზაციისთვის დამახასიათებელი გახდა საერთოდ, თუნდაც ამ მოწიწების, დისტანციის დაკარგვა ქალის მიმართ, მაგრამ საქართველოში ძალიან გამოიკვეთა. როგორც ყველა უბედურება, ესეც ძალიან გამოკვეთილია.
…ხელისუფლებისთვის მზია ამაღლობელი მისი მოწინააღმდეგეა. მეტი არაფერი არ არის საჭირო ჩვენი ხელისუფლებისათვის, იმიტომ, რომ ამაზე მისადაგებულ იდეოლოგიას შეგიქმნის.
„როგორ აბა, პოლიციის უფროსს რომ ხელი გაარტყა”… კი მაგრამ, პოლიცია მერე ჩნდება და თავიდან არის კაცი და ადამიანი უნდა იყო, აქედან ვიწყებთ.
ის პოლიცია როგორია, რომელმაც ასეთი წარმოუდგენელი სისასტიკე გამოავლინა და რომელიც მარადიორობს. […არ მიყვარს ხოლმე ყურმოკვრით ნათქვამი და უშუალოდ გაგებულ და რაც ჩვენ შეგვეხო იმას გეუბნებით] რომელიც იპარავდა, სცემდა ბავშვებს, გაზით წამლავდა, ამსხვრევდა, თავს უტეხდა, ბოტასებს და მობილურებს ჰპარავდა. …როგორ, შენ კლავ და იმას უკრძალავ, რომ ხელი გაანძრიოს?! ეს სად მომხდარა? შენ სცემ და იმას უკრძალავ, რომ ხელიც კი არ გაანძრიოს დასაცავად?! გესმით თქვენ, რა მსოფლმხედველობას ქმნიან ესენი?!
ჩვენ ყველას გვენატრება ისეთი პოლიცია, რომელსაც მე დამცველად აღვიქვამ და რომელიც მართლა ძალიან დიდი პატივისცემით ისარგებლებს ჩემგან. ყველას გვენატრება ასეთი პოლიცია, მაგრამ შენ რას ითხოვ არაადამიანურად ჩემგან?! – მცემოს, მაგინოს, მაფურთხოს, დამამსხვრიოს, ყველანაირი ტრავმა და შეურაცხყოფა მომაყენოს და მე ხელი არ უნდა გავანძრიო, წარმოგიდგენიათ?!
სწორედ ასეთ სპონტანურ ღირსების დაცვაზე დგას ჩვენი მორალის უწყვეტობა. გააწნა სილა, იმიტომ, რომ სილის ღირსი იყო და ახლა რაც უნდათ, ის თქვან. ეს ყოველთვის ასე მოხდება და დაიჭირონ მაშინ მთელი ქვეყანა. თვითონ იწვევენ პროვოკაციაზე, თვითონ იწვევენ ამაზე, რომ ადამიანმა ან გაარტყას, ან თავი დაიცვას, ან სხვა დაიცვას, ხომ მართალია?!
საერთოდ, რაც დატრიალდა, ამ სისასტიკეზე ვლაპარაკობ და ამ დაუნდობლობაზე – მე არ ვიცი ამ ხალხში რამ გააჩინა ასეთი სიძულვილი ახალგაზრდებისადმი და საკუთარი თავისადმი. მარტო იმას თვლიან ადამიანად, ვინც მაგათ უჭერს მხარს”, – ამბობს ნაირა გელაშვილი.
ნახეთ ვიდეო:
