შაბათს, 15 მარტს, საღამოს 19:00 საათზე, ბათუმში სოლიდარობის აქციაა დაგეგმილი.
აქციის ანონსის თანახმად, „ეს შეკრება წინააღმდეგობის მორიგი მაგალითია ყველა ჩაგრული, უფლებაშელახული მოქალაქისთვის სოლიდარობის გამოსახატად“.
აქციის მონაწილეები ბათუმის სახელმწიფო უნივერსიტეტის შადრევანთან [ბულვარის მხარეს] შეიკრიბებიან.
„მივაწვდინოთ ხმა თეატრალური უნივერსიტეტის რეპრესირებულ სტუდენტებს, უკანონოდ დაჯარიმებულებს, პოლიტიკური ნიშნით გათავისუფლებულ საჯარო მოხელეებს, დევნის სამიზნედ ქცეულ სამოქალაქო და პოლიტიკურ აქტივისტებს.
ჩვენ 106 დღეა ვდგავართ ახალი არჩევნების დანიშვნისა და პოლიტიკური პატიმრების გათავისუფლების მოთხოვნით. „ქართულმა ოცნებამ“ ამ წინააღმდეგობას საპოლიციო ძალა, რეპრესიული კანონები და სამართლიანობისგან დაცლილი სასამართლო სისტემა დაუპირისპირა.
ქვეყანაში სიღარიბის აღმოფხვრის, კორუფციის დაძლევის და უსაფრთხო გარემოს უზრუნველყოფის ნაცვლად, „ქართული ოცნება“ სდევნის თავისუფალ სიტყვას და ადამიანის ფუნდამენტურ უფლებებს ყოველდღიურად ლახავს.
15 მარტის შეკრება არის ჩვენი წინააღმდეგობის მორიგი მაგალითი ყველა ჩაგრული, უფლებაშელახული მოქალაქისთვის სოლიდარობის გამოსახატად.
თავისუფლება მზია ამაღლობელს!
თავისუფლება ზვიად ცეცხლაძეს!
თავისუფლება თემურ ქათამაძეს!
თავისუფლება ანრი კაკაბაძეს!
თავისუფლება პოლიტიკურ პატიმრებს!”, – ვკითხულობთ ღონისძიების აღწერაში ფეისბუქზე.
