პოლიცია 14 ჟურნალისტს „გზის ხელოვნურად გადაკეტვას“ ედავება.
ინფორმაციას ამის შესახებ საქართველოს ჟურნალისტური ეთიკის ქარტია ავრცელებს და აქვე აზუსტებს, რომ არსებული სია განახლებადია.
ქარტიის ინფორმაციით, შსს თოთხმეტივე ჟურნალისტს ადმინისტრაციულ სამართალდარღვევათა კოდექსის 174-ე პრიმა მუხლის, შეკრების ან მანიფესტაციის ორგანიზებისა და ჩატარების წესის დარღვევას ედავება, რაც თებერვალში შეცვლილი კანონმდებლობის მიხედვით ჯარიმას ითვალისწინებს 5 000 ლარის ოდენობით.
„პოლიცია გზის გადაკეტვას ედავება:
„სტუდია მონიტორის“ ჟურნალისტს ნინო შუბითიძეს, 17 თებერვალს;
„სტუდია მონიტორის“ ჟურნალისტს ნინო წვერავას, 17 თებერვალს;
„ტვ პირველის“ ფოტოგრაფს და ოპერატორს გიორგი მოსიაშვილს (შეატყობინეს 21 თებერვალს)
„პუბლიკას“ ჟურნალისტს ბასტი მგალობლიშვილს, 14 თებერვალს;
„ტაბულას“ ჟურნალისტს ბექა ჯიქურაშვილს, 14 თებერვალს;
„ტაბულას“ ჟურნალისტს ნიკოლოზ ჭირაქაძეს, 17 იანვარს;
„მთავარი არხის“ ჟურნალისტს ნათია გოგსაძეს, 2 თებერვალს;
„მთავარი არხის“ ჟურნალისტს ალექსანდრე საჯაიას, 4 იანვარს;
„მედია აპრილის“ ფოტორეპორტიორს ვახო ქარელს, 26 იანვარს;
„რადიო თავისუფლების“ ჟურნალისტს ეკა ქევანიშვილს, 22 იანვარს;
“ევრონიუსის” ჟურნალისტს დავით კეკენაძეს, 3 იანვარს;
„რადიო თავისუფლების“ ჟურნალისტს სალომე ჩადუნელს, 10 ნოემბერს;
ტელეკომპანია „მეცხრე ტალღის“ ხელმძღვანელს გერმანე სალიას, 13 დეკემბერს;
„რადიო თავისუფლების“ ჟურნალისტს გიორგი დიასამიძეს, 17 თებერვალს”, – ვკითხულობთ ქარტიის განცხადებაში.
დღესვე, 21 თებერვალს, „სტუდია მონიტორმა“ გაავრცელა განცხადება, რომ გამოცემის ჟურნალისტის, ნინო შუბითიძის წინააღმდეგ შს სამინისტრომ ადმინისტრაციული საქმის წარმოება სამსახურებრივი ცნობის საფუძველზე შეწყვიტა.
