„ბათუმელებისა“ და „ნეტგაზეთის“ დამფუძნებლის, მედიამენეჯერისა და ჟურნალისტის, მზია ამაღლობელის გათავისუფლების მოთხოვნით პეტიცია შეიქმნა.
„ორ ათწლეულზე მეტი მზია ამაღლობელი იბრძოდა პრესის თავისუფლებისთვის, დემოკრატიისა და საქართველოს ევროპული მომავლისთვის. ახლა ის წინასწარ პატიმრობაშია და სიცოცხლეს რისკავს ღირებულებებისთვის, რომელსაც ყოველთვის იცავდა.
ეს არ არის მხოლოდ მზიას ბრძოლა – ეს არის ბრძოლა ყველა უკანონოდ დაკავებული პატიმრისთვის, სიტყვის თავისუფლებისთვის და საქართველოს მომავლისთვის.
ვითხოვთ მზია ამაღლობელის დაუყოვნებლივ გათავისუფლებას“ – ვკითხულობთ პეტიციის ინგლისურენოვან ტექსტში.
პეტიციაზე ხელმოწერა და გაზიარება ნებისმიერ მსურველს შეუძლია – პეტიცია შეგიძლიათ ნახოთ ამ ბმულზე.
30 დღეა „ბათუმელებისა“ და „ნეტგაზეთის“ დამფუძნებელი მზია ამაღლობელი პროტესტის ნიშნად შიმშილობს. ის მხოლოდ წყალს იღებს.
- რა ხდება?
მზია ამაღლობელი 11-12 იანვრის ღამეს ორჯერ დააკავეს. პირველად დამხმარე ნაგებობაზე საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო“, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.
ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციული ქმედებებს მოჰყვა. 14 იანვარს ბათუმის საქალაქო სასამართლომ მზია ამაღლობელს აღკვეთის ღონისძიების სახით პატიმრობა შეუფარდა. გადაწყვეტილება სისხლის სამართალში კვალიფიკაციის არმქონე მოსამართლემ, ნინო სახელაშვილმა გამოაცხადა.
მზია ამაღლობელისთვის შეფარდებული აღკვეთის ღონისძიება მისმა ადვოკატებმა ქუთაისის სააპელაციო სასამართლოში გაასაჩივრეს, თუმცა ქუთაისის სააპელაციო სასამართლომ საჩივარი არც კი განიხილა.
