დღეს, 4 იანვარს, ბათუმში, ევროპის მოედანზე, მერიის მიერ ორგანიზებულ საახალწლო კონცერტზე ნუცა ბუზალაძის გამოსვლისას საპროტესტო აქციის მონაწილეებმა პლაკატები მიიტანეს, რომელზეც საპროტესტო აქციების დროს ნაცემი და დაკავებული ადამიანები იყვნენ გამოსახული.
„სირცხვილო! სირცხვილო!“ – ეძახდნენ საპროტესტო აქციის მონაწილეები მომღერალს, რომელიც წელს ხელისუფლების მიერ ორგანიზებულ საახალწლო კონცერტებზე გამოდის. შეგახსენებთ, რომ წელს საქართველოში მიმდინარე პროტესტის, „ოცნების“ ხელისუფლების მიერ აქციის მონაწილეების დაკავების და სასტიკად ცემის გამო 100-ზე მეტმა მუსიკოსმა უარი განაცხადა სახელმწიფო ღონისძიებებში მონაწილეობაზე.
ნუცა ბუზალაძემ ბათუმში პროტესტის მონაწილეებს უთხრა, რომ მათ ფული აქვთ აღებული.
„სირცხვილოს თუ ეძახით იმ ადამიანს, რომელიც ბავშვობიდან თქვენს სახელს წარმოადგენს, თან ძალიან მაგრად – სირცხვილო თქვენ. თქვენ დღეს მე ყურადღებას არ მოგაქცევთ, თქვენ თქვენი ფული ამაში აღებული გაქვთ“ – ასე მიმართა მომღერალმა პროტესტის მონაწილეებს.
„ჩვენ არა, შენ აიღე, შენ“ – უპასუხა მას საპროტესტო აქციის მონაწილემ.
ნუცა ბუზალაძე ბიუჯეტის ფულით მღერის საახალწლო კონცერტებზე.
ჯერ უცნობია, რა ჰონორარი გადაუხადეს მას ბათუმში, თუმცა ახალციხეში გამართული საახალწლო კონცერტისთვის ბუზალაძემ 18 ათასი ლარი მიიღო ბიუჯეტიდან.
მომღერალი ნუცა ბუზალაძე ევროვიზიის 2024 წლის კონკურსზე საქართველოს წარადგენდა. იგი 21-ე ადგილზე გავიდა.
2023 წელს ნუცა ბუზალაძე ცნობილ ამერიკულ პროექტში American Idol-ში მონაწილეობდა, სადაც 12 საუკეთესო მომღერალს შორის მოხვდა, როგორც უცხოელი შემსრულებელი. იმავე წელს ბუზალაძე მოსკოვში იმყოფებოდა სხვა ქართველ მომღერლებთან ერთად, კერძო წვეულებაზე კონცერტის გასამართად. ამერიკული შოუს მიმდინარეობისას ნუცა ბუზალაძეს საქართველოდან ბევრი ადამიანი გულშემატკივრობდა, ამიტომ მისმა გამოჩენამ მოსკოვში, კრემლის პროპაგანდისტების გარემოცვაში, კრიტიკული კითხვები გააჩინა.
ნახეთ ვიდეო:
