რამდენიმე კვირაა მაღალმთიანი აჭარის იალაღებზე მესაქონლეები ავიდნენ, თუმცა ბევრ მათგანს ელექტროენერგია ამ დრომდე არ აქვს.
„ბათუმელები“ შეეცადა გაერკვია, როდის მიეწოდება ელექტროენერგია მოიალაღეებს.
„საზაფხულო იალაღების უდიდეს ნაწილს ელექტროენერგია უკვე მიეწოდება: სამსმელოს მთა, კუნჭულეთი, ნათელათი, ქვაბიჯვარი, ჩიბუხნარი, ვერნების მთა, ბოძაურის მთა, დიდი იაილა, ვერხვნალი, უჩხოს იაილა, ბეშუმის იაილა, საკამბეჩო, ლოდიძირი, ქვედა ყორანას იაილა, შქერნალი, ძველი იეილა და ხარიათაღი.
დარჩენილ მთებში აქტიურად მიმდინარეობს დაზიანებული ელექტროგადამცემი ხაზების აღდგენითი სამუშაოები და უახლოეს 2 – 3 დღეში მოიალაღეებს ყველა დასახლებაში, სრული დატვირთვით მიეწოდებათ ელექტროენერგია”, – მოგვწერე ხულოს მერიის პრესსამსახურიდან.
„ბათუმელები“ რამდენიმე მოალაღეს ესაუბრა იმ ადგილებიდან, სადაც, ხულოს მერიის ცნობით, ელექტროენერგია უკვე ჩაირთო. ადგილობრივებმა გვითხრეს, რომ მათ ელექტროენერგია ჯერ კიდევ არ მიეწოდებათ.
„შესაძლოა იყოს შეფერხებები. დღის ბოლომდე აუცილებლად იქნება შუქი ამ იალაღებზე“ – გვითხრეს ხულოს მერიის პრესსამსახურში.
„ბათუმელები“ დაუკავშირდა კურორტ ბეშუმის დირექტორსაც იმის დასაზუსტებლად, თუ რა მდგომარეობაა ელექტროენერგიით უზრუნველყოფის მხრივ ბეშუმში, თუმცა კურორტის დირექტორმა ჩვენს კითხვას არ უპასუხა.
„ამ ეტაპზე ბეშუმს და სხვა ძირითადად იალაღებს ელექტროენერგია მიეწოდება. რამდენიმე იალაღია [ელექტროენერგიის გარეშე] დარჩენილი ხიხაძირის, ვაშლოვანის და დიდაჭარის მიმართულებით. ველოდებით მომართვას მათი მხრიდან და მომართვის შემდეგ, თუ ქსელი მოგვცემს საშუალებას და ყველანაირი უსაფრთხოების ნომრები დაცული იქნება, ჩვენი მხრიდან მიწოდებული იქნება ელექტროენერგია”, – გვითხრეს კომპანია ენერგო-პრო ჯორჯიას პრესსამსახურში, რომელიც აჭარაში ელექტროენერგიის მიწოდებას უზრუნველყოფს.
შუახევის მუნიციპალიტეტის პრესსამსახურის ცნობით, ელექტროენერგია ამჟამად შუახევის ორ იალაღს, მერიაყელსა და ღომას არ მიეწოდება.
