შს სამინისტროს აჭარის პოლიციის დეპარტამენტის დეტექტივების სამმართველოს უფროსად ვახტანგ ტერაშვილი დაინიშნა. ცვლილება 16 მაისისთვის განხორციელდა.
ბოლო ერთი წლის განმავლობაში აჭარის პოლიციაში დეტექტივების სამმართველოს უფროსი უკვე მესამედ შეიცვალა. ტერაშვილის დანიშვნამდე სამმართველოს ხელმძღვანელობდა გიორგი რევაზიშვილი, რომელიც ამ თანამდებობიდან დაახლოებით 2 თვის წინ გადადგა. როგორც შს სამინისტროში ამბობენ, ის სისტემამ ცენტრალური კრიმინალური პოლიციის დეპარტამენტში მიავლინა.
ბოლო მონაცემები ცხადყოფს, რომ შს სამინისტროს აჭარის პოლიციის დეპარტამენტში ხელმძღვანელი პირები რამდენიმე თვეში ერთხელ მაინც იცვლებიან. საზოგადოებისთვის უცნობია ცვლილებების მიზეზები. პოლიციელები, რომლებიც თანამდებობაზე ინიშნებიან აჭარაში, საზოგადოებრივ სივრცეებში თითქმის არ ჩანან [იშვიათი გამონაკლისი იყო ვალერი თელია, რომელიც მედიასთან კომუნიკაციის უფლებასაც აძლევდა საკუთარ თავს და საზოგადოებასთანაც], ასევე თითქმის არაფერია ცნობილი მათი პროფესიული უნარებისა თუ განათლების შესახებ.
