ბათუმის მერიის მცდელობა, აღკვეთოს ქალაქში უკანონო გარევაჭრობა, ახალი არ არის. მერიის სამსახურები გასულ წლებშიც უშედეგოდ ცდილობდნენ გარემოვაჭრეებთან მოლაპარაკებას. მერიაში ახლა ამბობენ, რომ პირველ ეტაპზე საზოგადოებრივი აზრი აინტერესებთ ამ საკითხზე.
„მერიამ გადაწყვიტა, საზოგადოებრივი აზრი შეესწავლა და მიმდინარეობს ინტერაქტიული გამოკითხვა. ჩვენთვის ძალიან მნიშვნელოვანია ქალაქის თითოეული მცხოვრების მოსაზრების დაფიქსირება ამ საკითხთან დაკავშირებით. რა შედეგი მოჰყვება გამოკითხვას, ამას უკვე გადაწყვეტს ზემდგომი ხელმძღვანელობა“ – აღნიშნა „ბათუმელებთან“ თეკლა ჩიჩუამ, მერიის საერთაშორისო და საზოგადოებასთან ურთიერთობის განყოფილების უფროსმა.
მისივე თქმით, მერია პირველ ეტაპზე გამაფრთხილებელ შეტყობინებას გაუგზავნის იმ 50 მაღაზიის მფლობელს წერეთლისა და ჯორჯიაშვილის ქუჩების მონაკვეთში, რომლებიც თავიანთი მაღაზიების წინ უნებართვოდ ვაჭრობენ.
„ბათუმელები“ გთავაზობთ მონაწილეობა მიიღოთ ალტერნატიულ გამოკითხვაში – როგორ უნდა მოაგვაროს მერიამ უკანონო გარევაჭრობის პრობლემა?
