„ზღვასთან ახლოს არ შეიძლება რაიმეს ჩამოსხმა ან მძიმე კონსტრუქციის განთავსება ინფრასტრუქტურის სამინისტროს ნებართვის გარეშე. ეს ქანდაკებაც ნებართვის გარეშე დადგეს, რის გამო ყველა ტექნიკური ნორმა დარღვეულია.
შარშან, წლის ბოლოსკენ ხშირი შტორმი იყო და ამან ქანდაკებას სულ გამოურეცხა საძირკველი. ამიტომ, მის გადატანაზე მუშაობა დავიწყეთ და კონკრეტულ ადგილს ავტორთან შეთანხმებით განვიხილავთ. ეს ადგილი არც ავტორს ჰქონდა თავიდან გათვალისწინებული“- განაცხადა „ბათუმის ბულვარის“ ადმინისტრაციის ხელმძღვანელმა გიორგი ზირაქაშვილმა „ბათუმელებთან“.
ქანდაკების ადგილმონაცვლეობისთვის „ბათუმის ბულვარის“ ბიუჯეტში 240 ათასი ლარია გათვალისწინებული, თუმცა, კონკრეტული დრო, თუ როდის გადაიტანენ ქანდაკებას, დაზუსტებული არ არის.
„ვერ ვიტყვი, რომ ერთ თვეში მოგვარდება ეს საკითხი, მაგრამ მუშაობა მიმდინარეობს“- აცხადებს ზირაქაშვილი.
ქანდაკების შექმნაზე ორ მილიონზე მეტი ლარი დაიხარჯა.
