Batumelebi | ბათუმის ბულვარის მერიის მართვაში დაბრუნების საკითხი ისევ ადმინისტრაციულ წარმოებაშია ბათუმის ბულვარის მერიის მართვაში დაბრუნების საკითხი ისევ ადმინისტრაციულ წარმოებაშია – Batumelebi
RU | GE  

ბათუმის ბულვარის მერიის მართვაში დაბრუნების საკითხი ისევ ადმინისტრაციულ წარმოებაშია

 

ბათუმის ბულვარის მერიის მართვაში დაბრუნების საკითხი ჯერ ისევ ადმინისტრაციულ წარმოებაშია.  ბულვარის მერიის მართვაში დაბრუნების საკითხს ბათუმის საკრებულომ მხარი 2014 წლის  აპრილში დაუჭირა. რის შემდეგაც ადმინისტრაციული წარმოება დაიწყო. გადაწყვეტილებას აჭარის ფინანსთა და ეკონომიკის მინისტრი ეწინააღმდეგებოდა. დავით ბალაძე აცხადებდა, რომ წინა მოწვევის საკრებულოს პირობებში ის ბულვარს მერიას არ დაუბრუნებდა. 

 

„ადმინისტრაციული წარმოება მიმდინარეობს,  როდის დასრულდება, ამას ჯერჯერობით ვერ გეტყვით. სავარაუდო ვადები არ გვაქვს. კარგი იქნება, თუ დასრულდება წლის ბოლოსთვის, რადგან ბულვარი არ არის მომგებიანი ორგანიზაცია და მას ბიუჯეტიდან სუბსიდირება სჭირდება.“ _ განუმარტა ბათუმის ვიცე-მერმა ზურაბ ბერიძემ

„ბათუმელებს“.

 

ვიცე-მერის განმარტებით, მისი პირადი პოზიციაა 2014 წლის განმავლობაში ადმინისტრაციული წარმოება არ დასრულდეს, რადგან მერიას ბულვარის მართვისთვის საჭირო სახსრების მოძიება გაუჭირდება.

 

„ მე არ მისაუბრია მასთან და არ ვიცი ახლა ფინანსთა და ეკონომიკის მინისტრს რა პოზიცია აქვს, მაგრამ კანონი ცალსახად ამბობს, რომ ადგილობრივი სკვერები და პარკები მუნიციპალიტეტის საკუთრებაა, თუ კანონმდებლობის შესაბამისად სხვა რაიმე არ არის გადაწყვეტილი. მე ტრაგედიას ვერც იმაში ვხედავ, თუ ბულვარი არ იქნება ბათუმის მერიის გამგებლობის ქვეშ. მთავარია შედეგი, ის, რომ ბულვარი იყოს მოვლილი მაღალ დონეზე, რა მნიშვნელობა აქვს, საიდან  დაფინანსდება. უბრალოდ  ამ საკითხს პოლიტიკურ ჭრილში სვამენ. დაქვემდებარებას თუ შეიცვლის ბულვარი, იქ ოქროს კოშკები ხომ არ აშენდება. იქ არავინ არაფერს ასხვისებს, პირიქით ფინანსთა სამინისტრო ხარჯავს ფულს ბულვარის ბილიკების რეაბილიტაციისთვის, თუ არ ვცდები, სამინისტრო ყოველწლიურად ბულვარის მოსავლელად ხუთიდან შვიდ მილიონამდე ლარს ხარჯავს.“  _ განაცხადა ზურაბ ბერიძემ „ბათუმელებთან.“

 

 

ბულვარი.
ბულვარი.

ნეტგაზეთის მასალების სხვა გამოცემებში გადაბეჭდვის წესი
ცაგო კახაბერიძე