ბათუმში, ზურაბ გორგილაძის ქუჩაზე მდებარე ვარდების სკვერში, ბოლო რამდენიმე თვეა არც ერთი სანაგვე ურნა არ დგას. ბათუმის მერიაში გვითხრეს, რომ „სკვერში განთავსებული ურნები იყო დაზიანებული, ისინი გაიტანეს და მათ უტარდებათ რეაბილიტაცია. ურნებს, რეაბილიტაციის შემდეგ, უახლოეს პერიოდში კვლავ დააბრუნებენ სკვერში“.
სკვერს, რომელიც მერიის ადმინისტრაციული შენობის გვერდითაა, ოთხი მხრიდან ქუჩა ესაზღრება. „სკვერის მიმდებარედ, ამ ქუჩებზე არის განათების ბოძები, რომლებზეც განთავსებულია დამატებითი პლასტმასის ურნები,“ – ამბობენ მერიაში.
ვარდების სკვერში, რომელშიც ვარდების ნაკლებობაცაა, სანაგვე ურნები, რაც ჩვენ დავაფიქსირეთ, სულ ცოტა მიმდინარე წლის მაისის თვიდან არ დევს.
სკვერში დღეს, 28 სექტემბერს, რამდენიმე სკამიც დაზიანებულია.