ნეტგაზეთი • RU

ბათუმის არქიტექტურის სამსახურის უფროსის განცხადება შუქურას შესახებ

 

ბათუმის მერიის არქიტექტურისა და ურბანული დაგეგმარების სამსახურის უფროსი, ირაკლი ახალაძე ბათუმის შუქურაზე არსებულ მიშენებაზე კომენტარს აკეთებს.

 

„ქალაქ ბათუმის მერიას მომართა საქართველოს სახელმწიფო ჰიდროგრაფიული სამსახურის ხელმძღვანელობამ და მოითხოვა შუქურის მიმდებარედ დამხმარე ნაგებობის მშენებლობა. მოგეხსენებათ რომ ჰიდროგრაფიული სამსახური ეწევა შუქურის ექსპლუატაციას და მის შემდგომ ფუნქციონირებაზე არის პასუხისმგებელი. ჩატარდა ადმინისტრაციული წარმოება, შეთანხმდა პროექტი, გაიცა მშენებლობის ნებართვა. თვითონ დამხმარე ნაგებობა აშენდა, ცალკე საკადასტრო ერთეულზე, შუქურა არის ცალკე საკადასტრო ერთეულზე,“ – განაცხადა ირაკლი ახალაძემ. 

ბათუმის შუქურა

მისი თქმით, მართალია ბათუმის შუქურა კულტურული მემკვიდრეობის ძეგლია, მაგრამ ახალი  ნაგებობა ცალკე საკადასტრო ერთეულზე დგას.

„ვინაიდან ორი ცალკე საკადასტრო ერთეულია, ნებართვა გაიცემა ადგილობრივი თვითმმართველობის მიერ. რაც შეეხება ერთიან შენობას, ის არის მხოლოდ ვიზუალურად ერთიანი. რაც შეეხება კონსტრუქციულ მხარეს აბსოლუტურად ცალკე მდგომი კონსტრუქციული შენობაა. ერთი კედელი საერთო არ ნიშნავს რომ ძეგლზეა მიდგმული,“ – განაცხადა ირაკლი ახალაძემ.

ჟურნალისტების კითხვაზე, რატომ გაიცა კულტურული მემკვიდრეობის ძეგლზე  მიშენების ნებართვა, ირაკლი ახალაძემ უპასუხა:

„ადმინისტრაციული წარმოების პერიოდში მიენიჭა ძეგლის სტატუსი შუქურას. აქედან გამომდინარე დამკვეთის მიერ წარმოდგენილი დოკუმენტებით არ დგინდებოდა რომ ეს იყო ძეგლი. შესაბამისად  წერილობითი თანხმობა კულტურული მემკვიდრეობის სააგენტოდან, ნებართვის გამცემი ორგანოდან არ არის. ამასთან აღსანიშნავია რომ 2011 წელს ბათუმის მერიას შუქურის რეაბილიტაციაზე აქვს გაცემული ნებართვა“.

კულტურული მემკვიდრეობის ძეგლს, ბათუმის შუქურას, 28 კვადრატული მეტრის შენობა- ნაგებობა მიუშენეს. მშენებლობის დამკვეთი სსიპ „ჰიდროგრაფიული სამსახური საქართველოა“, სამუშაოებს კი სამშენებლო კომპანია „ალისა“ ასრულებს. კომპანიის წარმომადგენლის განცხადებით 28 კვ. მეტრის ნაგებობაში სამი ოთახი განთავსდება.

ბათუმის მერიის არქიტექტურისა და ურბანული დაგეგმარების სამსახურის უფროსის განცხადებით კულტურული მემკვიდრეობის ძეგლსა და ახალ ნაგებობას შორის საერთო კედელი, არ ნიშნავს რომ ის ძეგლზეა მიდგმული

ნეტგაზეთის მასალების სხვა გამოცემებში გადაბეჭდვის წესი
"ბათუმელები"