ხულოს მუნიციპალიტეტი წელს 128 929 ლარს დაბა ხულოს ქუჩებისა და სოფლის ცენტრების დასუფთავება – ნარჩენების გატანისთვის დახარჯავს. გარემოს დასუფთავებისთვის ელექტრონული ტენდერი ხულოს გამგეობამ გასულ წელს ორ ეტაპად გამოაცხადა.
დაბა ხულოსა და სასოფლო ცენტრების დასუფთავებაზე, საპირფარეშოების მოვლასა და არასაყოფაცხოვრებო ნარჩენების გატანაზე ტენდერი 83 600 ლარზე 19 დეკემბერს გამოცხადდა, ხელშეკრულება ტენდერში გამარჯვებულ შპს „ხულოს სანდასუფთავებასთან“ 82 529 ლარზე გაფორმდა.
დაბა ხულოს მიმდებარე ტერიტორიიდან და კურორტ ბეშუმიდან კი ნარჩენებს შპს „სანდასუფთავება“ გაიტანს. ნარჩენების გატანისთვის გამარტივებული ელექტრონული ტენდერი მუნიციპალიტეტის გამგეობამ 46 400 ლარზე 19 დეკემბერს გამოაცხადა, ხელშეკრულება შპს „სანდასუფთავებასთან“ 46 400 ლარზე გაფორმდა.
ხელშეკრულების თანახმად კომპანიამ ნარჩენები ხულოს მუნიციპალიტეტიდან კვირაში ორ-სამჯერ უნდა გაიტანოს.
„ხულოს მუნიციპალიტეტის, ქუჩებისა და მიმდებარე ტერიტორიის დასუფთავება-ნარჩენების გატანაზე გამოცხადებულ ტენდერში წელსაც იმავე ფირმებმა გაიმარჯვეს, რომლებმაც გასულ წელს უზრუნველყვეს ნარჩენების მართვა. მათი მუშაობით უკმაყოფილო არ ვართ, გამოცდილი კომპანიები არიან და ხელშეკრულებით ნაკისრ ვალდებულებებს კარგად ასრულებენ. ზამთარში დაბისა დ მიმდებარე ტერიტორიის დასუფთავება ხდება, ზაფხულში, სეზონურად გავდივართ კურორტ ბეშუმსა და შორს სოფლებშიც. კვირის განმავლობაში სრულად საკმარისია ნარჩენის გატანა კვირაში სამჯერ.
ნარჩენების მართვასთან დაკავშირებით გამოიცა კანონი, რომლის მიხედვითაც ერთი წლის განმავლობაში ნარჩენებთან დაკავშირებით ვითარება ყველა ხეობასა და სოფელში უნდა მოწესრიგდეს, დაიგეგმოს სამუშაოები ამ კუთხით, ალბათ იქაც მოხდება ნარჩენების შეგროვება“ – ამბობს ხულოს მუნიციპალიტეტის გამგეობის ეკონომიკური პოლიტიკისა და ინფრასტრუქტურის სამსახურის უფროსი ზაზა აბულაძე.
