Batumelebi | საქართველოსა და ლიტვის პრეზიდენტების ვიზიტი ბათუმში საქართველოსა და ლიტვის პრეზიდენტების ვიზიტი ბათუმში – Batumelebi
RU | GE  

საქართველოსა და ლიტვის პრეზიდენტების ვიზიტი ბათუმში

 

დღეს ბათუმში საქართველოს პრეზიდენტი გიორგი მარგველაშვილი ლიტვის პრეზიდენტთან ანდრის ბერზინშისთან ერთად იმყოფებოდა. ორი ქვეყნის პრეზიდენტი სასტუმრო შერატონში გამართულ ბიზნეს ფორუმს დაესწრო. 

„საქართველოს ეკონომიკური პოლიტიკის პრიორიტეტებს შორის ძირითად მიმართულებას წარმოადგენს ლიბერალური საგარეო სავაჭრო პოლიტიკა. ის ნაბიჯები, რომელიც ჩვენ გადავდგით და რა მიმართულებთაც ვმოძრაობთ ბუნებრივად აისახება იმ ბიზნეს კლიმატზე რომელიც არის საქართველოში. საქართველო დღეს მსოფლიოში ერთ-ერთ ყველაზე საინტერესო საინვესტიციო კლიმატს ქმნის. ასევე რეგიონში ჩვენ ვართ ლიდერი ინვესტიციების და სავაჭრო პოტენციალის თვალსაზრისით,“ – განაცხადა საქართველოს პრეზიდენტმა გიორგი მარგველაშვილმა ბიზნესფორუმზე სიტყვით გამოსვლისას.

მისივე თქმით საქართველომ ახლახანს გადადგა მნიშვნელოვანი ნაბიჯები ევროპის სავაჭრო სისტემაში, ერთიან ევროპულ ბაზარში ინტეგრირების თვალსაზრისით.

„ხაზგასასმელია ასოცირების ხელშეკრულება, რომელსაც ახლახანს მოვაწერეთ ხელი და ასოცირების ხელშეკრულების ფარგლებში  ღრმა და ყოვლის მომცველი თავისუფალი ვაჭრობის შესახებ ხელშეკრულება. ამ ხელშეკრულების ხელმოწერის შემდეგ ჩვენ რეალურად ვხსნით საქართველოდან ევროპის მსოფლიოში ყველაზე დიდ და ძლიერ ბაზარს ინვესტორებისათვის.

ხაზგასასმელია, აქვე ის რომ ეს ნაბიჯი არავის საწინააღმდეგოდ არ არის მიმართული და საქართველოს, როგორც ქვეყანას, არ უზღუდავს სხვა ქვეყნებთან თავისუფალი ვაჭრობის შესახებ ხელშეკრულების გაფორმებას და გაღრმავებას იმ ურთიერთობებისა, რომელიც საქართველოს მანამდე ჰქონდა ამ მიმართულებით.

თუ ჩვენ ჯამში შევაფასებთ იმ პოტენციალს, რომელიც ამ ხელშეკრულების ხელმოწერის შემდეგ საქართველოს შეექმნა, ჩვენ შეგვიძლია დავინახოთ, რომ ერთი მხრივ, ჩვენ ახლა  500 მილიონიან ევროპულ ბაზარს ვუხსნით ინვესტორს, ასევე ჩვენ გვაქვს თავისუფალი ვაჭრობის ხელშეკრულება თურქეთთან, ასევე ჩვენ გვაქვს თავისუფალი ვაჭრობის ხელშეკრულება   დსთ-ს ქვეყნებთან. ეს ნიშნავს, რომ ჯამში ჩვენ ინვესტორებს დაახლოებით 900 მილიონიან ბაზარს ვუხსნით იმ შემთხვევაში, თუ ისინი თავის ბიზნესს განახორციელებენ საქართველოში”, – განაცხადა გიორგი მარგველაშვილმა.

უმნიშვნელოვანია ის ტრადიციული როლი, რომელიც საქართველოს უკავია ბიზნესის კუთხით, ის გეოპოლიტიკური როლი, რომელიც ჩვენ გვიკავია და რომლიდან გამომდინარეც, ჩვენ ვართ აბრეშუმის გზის ერთ-ერთი საკვანძო ქვეყანა. ამ თვალსაზრისით, საქართველოს როლი, როგორც კასპიის რეგიონის და შავი ზღვის რეგიონის დამაკავშირებელი როლი არის უმნიშვნელოვანესი. ახლახანს ჩვენ ხაზი გავუსვით იმას რომ ევრაზიის რეგიონში არსებული 14 ქვეყნიდან, რომელთაც არ აქვთ ზღვაზე გასასვლელი, საქართველო აი ამ რეგიონში  8 ქვეყნისთვის არის ზღვაზე გასვლის შესაძლებლობა და ეს ბუნებრივია ისევ ჩვენს საკომუნიკაციო როლს უკავშირდება. მნიშვნელოვანია საქართველოს ჩართვა ახალ აბრეშუმის გზაში,“ – განაცხადა საქართველოს პრეზიდენტმა ბიზნეს ფორუმზე სიტყვით გამოსვლისას.

ბიზნეს ფორუმამდე საქართველოსა და ლიტვის პრეზიდენტები აჭარის მთავრობის თავმჯდომარეს, არჩილ ხაბაძეს აჭარის მთავრობის ადმინისტრაციაში შეხვდნენ. შეხვედრაზე მხარეებმა საქართველოსა და ლატვიას შორის არსებულ თანამშრომლობასა და სამომავლო თანამშრომლობაზე ისაუბრეს. ასევე დღეს ბათუმში ლატვიის საპატიო საკონსულო გაიხსნა.  საკონსულო ლატვიის პრეზიდენტმა, ანდრის ბერზინშმა და ლატვის საპატიო კონსულმა საქართველოში, ბექა ქანთარიამ. დღესვე საქართველოს და ლატვიის პრეზიდენტებმა ბათუმში განახლებული საზღვაო აკადემიის სასწავლო ცენტრი გახსნეს.

ბათუმის სახელმწიფო საზღვაო აკადემიამ  გერმანული  კომპანია „Festo“ – სგან შეიძინა ლაბორატორიული სტენდები.  საქართველოს ეკონომიკისა და მდგრადი განვითარების სამინისტროს ბიუჯეტიდან აღნიშნული სამუშაოებისათვის2 000 000 ლარი  დაიხარჯა . დაახლოებით 500 000 ლარი კი  აჭარის ავტონომიური რესპუბლიკის ბიუჯეტიდან გამოიყო.

ამჟამად საზღვაო აკადემიაში სულ 4 ლაბორატორიაა. ავტომატიკის, ელექტროტექნიკის, პნევმატიკისა და ჰიდრავლიკის. საწვრთნელი ცენტრი კი  თანამედროვე სასწავლო სიმულატორებით არის აღჭურვილი.

ნეტგაზეთის მასალების სხვა გამოცემებში გადაბეჭდვის წესი
მანანა ქველიაშვილი